Mga higante apil sa national pool ni Yeng Guiao

Mahilakip na sa Team Pilipinas pool ni coach Yeng Guiao ang mga magduduwa nga makabalik na human nakaserbisyo sa suspensyon nga gipahamtang sa FIBA.

Sila si naturalized player Andray Blatche, Jayson Castro, Terrence Romero ug Troy Rosario gituohang pulos mangapil sa pool nga giporma ni Guiao alang sa kampanya sa Team Pilipinas sa 5th window sa FIBA World Cup Asian qualifiers sa sunod buwan.

Ang nangahisgutang mga magduduwa pulos na nakahuman sa ilang tulo ka mga duwa nga suspensyon sa FIBA tungod sa ilang pagkahilambigit sa karambolang nahitabo tali sa Gilas Pilipinas ug Australia Boomers niadtong Hulyo.

Ang Pilipinas nakatakdang mo-host og duha ka sunodsunod nga mag duwa karong Nobiyembre 30 batok sa Kazakhstan ug karong Disyembre 3 batok sa Iran nga parehong ipahigayon sa Mall of Asia Arena.

Lakip sa seguradong maapil sa pool ni Guiao mao ang mga higanteng sila si 6’10” JuneMar Fajardo, 7’0” Greg Slaughter ug ang 7’3” nga batan-ong si Kai Sotto.

Gibanabanang moabot sa 20 ka mga magduduwa ang ipanglista ni Guiao alang sa national pool nga iyang ipresentar ngadto sa Philippine Basketball Association (PBA) board sa papangulo ni chairman Ricky Vargas sa usa ka espisyal nga panaghugpong karong Nobiyembre 6.

“The PBA governors want to know who will be the players in the pool for them (players) to be notified,” pamahayag ni PBA commissioner Willie Marcial sa Spin.ph.

"The board also wants to know the program and the schedule of practices. Pero kahit sino ang players na tawagin, for sure ibibigay yan ng PBA.”