PCCL MAOY SUNOD NGA MISYON SA UV
Human niya naagak ang University of the (UV) Green Lancers sa laing Grandslam title sa Cebu Schools Athletic Foundation Inc. (CESAFI), si coach Gary Cortes nagtutok na alang sa mas malisod nga misyon niini pa lang ka sayo – Philippine Collegiate Champions League (PCCL).
Gipasabot ni Cortes nga tam-is man tuod ang kalampusan sa iyang pag-agak sa Green Lancers sa Grandslam title sa Cesafi apan alang kaniya, haw-ang gihapon ang iyang pagbati kon dili niya matuboy ang team sa kampiyunato sa PCCL.
“Kini na lang gyud ang PCCL nga wala ta mag-champion,” matod ni Cortes sa pagpakighinabi ning mantalaan.
Sa labing una niyang tuig isip headcoach sa Green Lancers, natuboy ni Cortes ang team ngadto sa ikatulong dapit sa PCCL niadtong 2015, nga maoy labing nilang naabot sa prestihiyusong torneyo.
Human niini, ang Green Lancers nanamilit dayon sa labing una pa lang nilang tahas sa Elite 8 sa PCCL niadtong 2016 ug 2017.
“Kon dili man gani mi mag-champion, bisan malabwan lang namo ang 3rd place finish namo atong 2015, first nakong pagdala sa team sa PCCL,” asoy ni Cortes.
Ang laing edisyon sa PCCL, panagtigi sa nanag-unang teams sa nagkadaiyang schoolbased nga torneyo sa nagkalainlaing suok sa Pilipinas, gilaumang ipahigayon sa sayong bahin sa sunod tuig.
Matod ni Cortes nga naghuwat na lang sila nga mogawas ang eskedyul sa PCCL aron makasugod na sila og pagpangandam niini.
“Wala pa may klaro kon kanus-a ang PCCL basin sa Enero seguro. Naghuwat lang mi sa schedule. Karon, pahuway lang una mi,” dugang ni Cortes.
Sa laing bahin, gipabuhagay ni Cortes nga nagbukal lang gihapon sa kalipay ang iyang dughan kagahapon, usa ka adlaw human naangkon sa Green Lancers ang Grandslam title pinaagi sa 74-61 nga kadaugan batok sa University of San Jose Recoletos (USJ-R) Jaguars sa deciding Game 3 sa Cesafi finals niadtong Lunes sa Cebu Coliseum.
Ning maong duwa, igo ra’ng nagtan-aw si Cortes gumikan kay suspendido kini tungod sa iyang duha ka technical fouls nga naangkon sa Game 2.
Gipasabot ni Cortes nga sa tulo ka sunodsunod nga titulo nga iyang natunol sa Green Lancers, kini maoy iyang labing pagahandumon.
“Daghan kaayo mi’g struggles karon nga season tungod sa injuries ug mga sakitsakit sa akong players. Naa pa’y time nga siyam na lang ang akong players,” asoy ni Cortes.
“Pinaka-sweet gyud ni nga victory sa tanan kay dili sayon ang among naagian.”/