REKORD NI CURRY GIBUAK NI KLAY
Nagpauwan og 14 ka threepoint shots si Klay Thompson sa iyang pagmugna og 52 puntos sa dakong kadaugan sa defending champion Golden State Warriors batok sa host Chicago Bulls, 149-124, kagahapon sa National Basketball Association (NBA).
Ang 14 ka 3-pointers ni Thompson maoy nakabuak sa rekord nga kanhi gigunitan sa iyang kaubang si Stephen Curry nga 13 ka 3-pointers nga napatik niadtong Nobiyembre 7, 2016.
Namugna ni Thompson ang iyang ika-14 ug katapusang three-point shot sa duwa sa nahabiling kapin sa upat ka mga minutos sa 3rd quarter pa lang.
Nagsaulog si Thompson human niya napasulod ang maong tres samtang nagpaingon ang Warriors sa ilang lingkuranan gumikan sa timeout. Niadtong higayuna, makabungog na ang labaw sa Warriors, 113-69.
Nagkanayon si Thompson nga dili niya kini mahimo kon wala siya tabangi sa iyang mga kauban.
“That’s what I do this for is those moments that you share with your teammates,” matod ni Thompson.
“That’s why we play basketball. It’s a collective effort. And I don’t know if I would be able to break these records I have gotten in my past like tonight without the system I play in or the team I play with, the guys I play with.”
Sa wala pa siya nagmangtas ning kombatiha, si Thompson nagkagidlay pa sa iyang mga itsa ug igo lang kining mirehistro og 5-of-36 sa three-point land sa nag-unang pito ka mga duwa sa Warriors.
Si Thompson nakapabuto na og 10 ka tres dihang nakaposte ang Warriors og 92-50 nga labaw sa halftime. Mao kini ang ikaduha sa labing dakong puntos nga nahimo sa halftime sunod sa 107 puntos nga namugna sa Phoenix Suns niadtong 1990.
Ang Warriors, nga ningsaka sa 7-1 nga baraha, nakabuak sab og kasaysayan dihang nakatigom na sila og 17 ka tres sa halftime.
“This is what it’s been like,” matod ni Warriors coach Steve Kerr. “I can’t even tell you how lucky I am and how I feel every night watching these guys, how unselfish they are.”
Si Curry nidugang og 23 puntos alang sa Warriors, niamot og 19 puntos si Alfonzo McKinnie samtang nitampo og 14 puntos si Kevin Durant.
Ang Bulls, nga nahagsa sa 2-5 nga rekord, gipangulohan nila ni Zach LaVine ug Antonio Blakeney pinaagi sa ilang
21 puntos matag usa samtang nihatag og 18 puntos si Wendell Carter Jr.
Sa 1st quarter pa lang, si Thompson nakapauwan na og unom ka three-point shots ug 22 puntos.
Ning mga gutloa, determinado na ang Warriors nga tabangan si Thompson nga makabuak og rekord ug kanunay kini nila pangitaon sa three-point area.
“The most important thing was I passed it to him on his 14th,” matod ni Durant. “
Nagkanayon si Thompson nga sa iyang pamati, dili siya masipyat sa iyang matag itsa niining duwaa.