500 KA SAKYANAN, APIL SA MGA MOTOR NGA GI-IMPOUND, IBALIGYA SA LTO SA PUBLIKO

Kapin sa 500 ka mga na-impound nga sakyanan ang ipasubasta sa Land Transportation Office (LTO) 7 karong Nobiyembre, human kapin unom ka buwan na kini nga wa giproseso sa mga tag-iya aron lukaton.

Kagahapon, gibutyag ni LTO 7 Regional Director Victor Caindec nga nakadawat na sila og go signal sa Commission on Audit (COA) kabahin sa ilang plano nga ipasubasta kining mga sakyanan.

Unang higayon kini nga magpa-auction ang LTO 7 sa mga sakyanan nga ilang na impound.

Matod ni Caindec nga 524 ka mga sakyanan, lakip motorsiklo, ang ilang ipasubasta, diin 440 niini mga motorsiklo, 51 ang four-wheeled vehicles, lakip ang jeep, 30 ka vans ug tulo ka trailers.

Sa pagkakaron puno na ang bag-ong impounding area sa LTO 7 diin luna kini nga gipagamit sa Cebu Province nga anaa mahimutang sa M. Cuenco avenue, Banilad, dakbayan sa Sugbo.

Anaa kini’y gilapdon nga 3,000 metro kwadrado.

“In November, we intend to complete the auctioning of impounded vehicles in LTO 7,” si Caindec nagkanayon.

Sa pagkakaron anaa pay 370 ka mga sakyanan nga anaa sa ilang bag-ong impounding area samtang ang nahabilin naa pa sa karaan nga impounding, apan gikatakda kini nga ibalhin nila.

Sagad sa mga violation niining na-impound kining mga way dokumento, peke ang dokumento, ug kolurom.

Gibutyag usab ni Caindec nga nagbayad ang LTO 7 og P380,000 matag buwan alang sa impounding area nila kaniadto.

Karon nga anaa na sa Sugbo ang Inter-agency Council on Traffic (IACT) matod ni Caindec nga magpadayon ang ilang kooperasyon sa pagpanakop sa illegal nga nagdagan nga sakyanan, naglakip ang illegal parking sa kadalanan. /