53,100 ka pasyente ang natabangan sa Malasakit gikan sa Kabisay-an

Niabot na og 53,100 ka mga pasyente ang natabangan sa Malasakit Center sukad kini gilusad niadtong Pebrero.

Kini nagtanyag og libre nga makapatambal o serbisyong medical sa Vicente Sotto Memorial Medical Center (VSMMC).

Si Dr. Gerardo Aquino Jr., ang pangulo sa VSMMC, nagkanayon nga gumikan sa maong programa ni Presidente Rodrigo Duterte, namenosan ang gihambin nga balatian sa mga pamilyang kabus nga nakapahimulos niini.

Lakip sa mga benepisyo sa gitanyag nga ayuda sa Malasakit Centers mao ang dialysis, anaa usab ang lainlaing matang sa sakit ug ang labing dako mao ang open heart surgeries.

Mga pasyente nagagikan sa mga dapit sa Kabisay-an.

“Since February up to October, naa na tay 53,107 patients nga natabangan including sa mga dialysis patients ug naa pa gyuy natabangan nga open heart surgeries. Ingon ana ang natabangan nato sa Malasakit Center,” padayag ni Aquino.

Gihulagway sa medical chief sa VSMMC nga kaniadto, ang tagtungod sa pasyente maabtan og tagpila ka adlaw sa di pa makagawas sa tambalanan bisan kon naayo na ang sakit sa ilang pasyente sanglit lainlaing ahensiya ang ilang bisitaon aron magpatabang.

Apan gumikan sa Malasakit, one-stop shop na ang mga funding agency.

Mga ahensya nga duolon kanunay sa mga kabus nga pasyente mao ang PhilHealth, Philippine Amusement and Gaming Corporation (PAGCOR), Philippine Charity Sweeptakes Office (PCSO) ug Department of Social Welfare and Development (DSWD) ug paglabay sa pipila ka oras, makumpleto ang mga dokumento ug makauli na ang pasyente.

Di lang ang VSMMC ang accredited na karon nga tambalanan sa Malasakit.

Gipadayag ni Aquino nga ang Eversely Childs Sanitarium sa Mandaue City, Talisay City District Hospital, Saint Anthony Mother and Child Hospital, pulos na akreditado sa Malasakit Centers.