SINAS SUPORTAHAN NI ALBAYALDE, AñO

Nipasalig silang Philippine National Police Director General Oscar Albayalde ug Interior Secretary Eduardo Año sa hepe sa Police Regional Office (PRO) 7 nga mosuporta kanila kon ihinayon sa Senado ang inquiry labot sa mga pagpatay sa Central Visayas tungod sa gubat batok sa ilegal nga drugas.

Atol sa panagtagbo nilang PRO 7 Director Chief Supt. Debold Sinas, Albayalde ug Año niadtong Oktubre 30 sa gabii, usa sa ilang nahisgutan ang tinguhang pagpatawag og Senate inquiry tungod sa kadaghan sa mga namatay sa anti-drug operations.

Matod ni Sinas nga gimandoan siya sa Chief PNP nga mangandam sa pagdungog ug gihatagan siyag pagtugot nga motunga sa ipatawag nga hearing sa Senado.

Gipasaligan hinuon siya sa duha niya ka mga labaw nga mosuporta kaniya ug di angay nga mabalaka sanglit nasayod kini sa resulta sa imbestigasyon sa maong mga hitabo.

Tungod niini, taas ang kompiyansa ni Sinas ug andam kini nga mopakita sa mga dokumento sa resulta sa imbestigasyon sa tanan nga nangamatay sa ilang gihimong anti-drug operation.

Nagduda hinuon siya nga dako ang posibilidad nga sakyan sa politika ang maong Senate inquiry tungod sa mga senador nga naa sa oposisyon nga maoy nangugat nga molusad sa inquiry.

“We are very happy kon kinahanglan nilang data. Ihatag man namo ang data sa ilaha. Ang concern lang namo is now to become a political issue, kabalo na man ta,” matod ni Sinas.

Niabot na sa 254 ka mga drug pusher ug users ang napatay atol sa anti drug operation ug kining tanan adunay imbestigasyon ang Regional Internal Affairs Service (RIAS) 7 nga ang resulta pulos lehitimo.