North Bus Terminal gidagsa na sa mga pasahero
Bisperas pa lang sa Kalag Kalag, kagahapon, Oktubre 31, hinay-hinay na ang pagabot-abot sa mga tawo nga mouliay sa probinsya sa Cebu North Bus Terminal (CNBT) sa siyudad sa Mandaue.
Pasado ala una kagahapon ang sugod pagdagsa sa mga pasahero, ug pag-abot-abot usab sa mga bus sud sa terminal hinungdan nga nakadugang sa paghuot sa trapiko sa may dan M. Logarta, Barangay Subangdaku.
Hinuon bisan sa pagdaghan na sa mga pasahero, istriktong gipatuman sa CNBT ang ilang sistema nga kinahanglan aduna unay ticket sa bus ug kinahanglang molinya padung sakay sa bus. Gilantawan nga karong buntag, Nobiyembre 1, ang grabeng pagdaghan pa sa mga pasahero.
Si P/SSupt. Julian Entoma, director sa Mandaue City Police Office, nisusi kagahapon sa CNBT pagbuntag ug hapon.
Uban kaniya ang mga sakop sa Police Community Relations (PCR) nga niapud-apud sa mga safety tips sa pagbiyahe, pagsud sa sam-ang ug mga angay ug di angay buhaton kon biyaan ang mga balay ning panahon sa Kalag Kalag, ilabi na nga long weekend.
Nisusi usab ang mga sakop sa Explosive Ordnance Division (EOD) uban ang K9 dog.
Gisusi usab ni Entoma ang mga pantalan sama sa Ouano wharf.
Sa pagduaw ni Entoma sa mga sam-ang, iyang gitug-an nga minus pa ang niduaw, apan pahimangno na niya sa publiko nga bisan sa presensya sa mga pulis di angay mokompyansa gikan sa mga kawatan, nga ang mga pulis ug biktima ra usab ang gibantayan.
“Usa gyud na sa nakapataas sa ato crime stats nohh, kini mabiktima sa salisi gang, mangunguot, mao na di maayo magpasaya-saya sa mga mahalong butang, vigilant sa atong mga butang sad, though naningkamot kita, ato mga intel kanunay nag-monitor niining mga si kinsa ning kawatan, kasagaran ani nila mga dayo ra,” pahinumdom ni Entoma.