2 ka tulisan nadakpan sa Poblacion Pardo

Duha ka gikatahapang mga notadong tulisan nga giingong nanulis sa kaadlawon sa Miyerkules, Oktubre 31, nasikop sa hot pursuit operation sa mga sakop sa Pardo police station ug positibo nga gitudlo sa ilang gibiktima.

Ang mga suspek giila nga silang Rusty Cabigas, 25, taga sitio San Vicente, Barangay Bulacao, siyudad sa Sugbo ug Liljun Anga, 20,taga Sitio Colo, Barangay Inayawan.

Matod ni P/CInsp. Regino Maramag, hepe sa Pardo police station, nga mga pasado alas 5 kagahapon sa kaadlawon, samtang nagpaabot og masakyang PUJ si Rebecca Espinosa Iglamo, 54, taga Inayawan sa may F. Jaca street, Barangay Poblacion Pardo, kalit lang giduol sa mga suspek ug gitionan sa dala niining armas.

Nideklarar ang duhag tulis, nimando nga ihatag ang bag nga adunay sud nga cellular

phone ug importanteng mga dokumento, lakip na ang alahas niini.

Human makuha nila ni Cabigas yano ra kining nagbaktas palayo sa biktima ug tungod kay duol ra ang police station sa Pardo dali ning nagpatabang sa mga police.

Gilusad gilayon ang manhunt operation ang kapulisan ug ilang naabtan ang mga suspek nga positibong gitudlo sa biktima ug nabawi ang bag nga anaa pa sa sulod ang iyang mga butang.

Nakuha usab ang kalibre .38 gikan sa posisyon ni Anga nga andunay lima ka bala samtang usa ka pakete sa gituohang shabu ang nakuha kang Cabigas.

Dugang ni Maramag nga notado na nga tulisan si Cabigas.

Makadaghan na kini mabilanggo sa Cebu City Jail sa kasong pagpanulis.

“Notado na nga tulisan, daghan nag natulis diri sa Pardo nya kanang usa kanang si Anga, recruit lang na ni Cabigas kay wala pa nay record,” matod ni Maramag.

Niawhag si Maramag sa publiko nga nabiktima sa pagpanulis sa ilang dinakpan nga mahimo sila nga mobisita sa Pardo police station aron mopasakag kaso.

Ila usab nga i-review ang mga kaso sa pagpanulis sa syudad sa Sugbo kon sila ba ang posibling nag himo.

Niangkon matod pa si Cabigas nga daghan na siyag nabiktima ug nasulod na sa bilanggoan apan nakagawas ra usab human maka pyansa ug ang ubang biktima wala na mopasakag kaso sa korte.