I believe in dreams
Mogawas na unta ko sa plasa apan wa ko kadayon kay giduol ko ni Samuel. Misamot siya kaguwapo sa akong tan-aw ron niya. Dagko siyag mga braso ug naklaro kini kay nagsul-ob man siyag sleeveless nga tisirt.
“Nia ka man diay dinhi, Sam.” Nag-atubang mig tindog si Samuel sa may gate sa plasa. Gipaningot siya. Aw, matag hapon man diay siya mag-jogging. Mao kini ang iyang buhaton inay sa buntag siya magdagan-dagan sa palibot sa plasa.
“Gikan kong nag-jogging, Bon. Mopauli na unta ko pero nakita ta man ka dinhi.”
“Nagsuruy-suroy lang gud. Laay man sab sa ba’ay kon tua lang kanunay didto.”
Nagpahiyom si Samuel nako. Aw, gipahiyoman ko sab siya. Miduko ko ug nagduwa-duwa sa mga tudlo sa akong kamot. Usa si Samuel sa akong mga suitors. Dugay na siyang nangulitawo nako. Almost two years na. Parehas ming third year college si Samuel.
“Nindot man gud suroyan dinhi kay bugnaw man ang hangin labi nag hapon. Nalipay ko, Bon, nga nagkita ta karon.”
“Please di ta maghisgot bahin sa love, Sam. You know already my decision.”
Nakapanghupaw si Samuel nga mitan-aw sa nagduwag basketball. Naluoy baya ko niya kay nasuta ko man nga nagmatinud-anon siya sa iyang tuyo nako. Sa gidugayon sa iyang pagsigeg pangulitawo nako, nabatyagan ko ang tinud-anay niyang pagmahal nako. Apan unsaon man gud ning kasingkasing, mao may magbuot, di man ang hunahuna.
“Wa ba gyud koy chance nimo, Bon?”
Ako na sab ang nanghupaw. Gikuptan ko ang usa ka bukton ni Samuel. Seryuso kaayo ko. Gusto kong ipakita kang Samuel nga nagsulti ko niya sa tinuod.
“Kon love pa tika, Sam, di tika paantuson og dugay. Unsaon man gud, inigsuon man lang gyud ang gibati ko nimo.”
Wa na magdugay si Samuel sa pagpakig-estorya nako. Nananghid siya nako nga mobiya na. Ambot ba sab, uy, nga di man katudloan ang kasingkasing. Buotan man unta si Samuel ug anak og dato. Apan wa gyud koy love niya.
Gitan-aw ko sila si Jinno ug Marlene. Nagtapad silag lingkod sa sementong lingkoranan sa plasa samtang nagtan-aw sa nagduwag basketball. Nagkupot si Marlene sa bukton ni Jinnno. Sa akong tan-aw, morag nakagusto sab si Jinno kang Marlene.
(SUMPAYAN)