Dili angay mausab

Kada buntag maglakaw ra si Rudy ngadto sa merkado sa lungsod sa Carmen aron pagpalit og Superbalita. Usa ka kilometro ang gilay-on sa merkado gikan sa ilang balay luyo sa munisipyo. Kinse minutos ang iyang lakaw padulong ngadto; kinse minutos pod inig balik niya. Dala pasingot ug paugnat sa kusog ang iyang gibuhat kay senior citizen na siya ug may dayabetes. Sa iyang nabasahan sa mga sinulat sa mga doktor mahitungod sa panglawas, ang kinse minutos nga paglakaw matag adlaw makahatag nag kapiskay sa panglawas sa tawo. Busa iya ning gibuhat. Gani gidoble niya. Trayenta minutos na ang iyag paglakaw-lakaw matag adlaw.

Paggawas niya karong buntaga misilang na ang Adlaw. Way ulan. Tin-aw ang kalangitan nga may pipila ka patak-pat-ak sa mga panganod. Nahimuot siya nga mihanggap og lab-as nga hangin ug nakaingon, “Salamat, Lord. Usa na sab ka maanindot nga kabuntagon!” Nagpahiyom siya naglakaw sa walang habig sa karsada.

Unya may miurong nga motorsiklo dapit sa iyang tuo. Gilingi niya ang nagsakay.

“Maayong buntag, Te!” matod sa batan-ong lalake nga nag-inusarang nagsakay sa motorsiklo.

“Maay- ong buntag sab!” ni Rudy nga nagpahiyom. Mihunong paglakaw. Bisag nasayod siya nga wa kaila niya ang batan-on ug wa sab siya kaila niini, iyang gitagad. Naalaan lang si Rudy sa batan-on nga laing tawo. Gitangtang niya ang iyang gisul-ob nga ‘shades’ aron magkatinan-away sila.

“Uy, abi nakog si Tete Manto ka, Sir!” matod sa batan-on nga maulawon.

“Sa ato pa, kay dili man ko si Tete Manto, dili na diay maayo ang kabuntagon?” Kasultion si Rudy ning mga pulonga, apan wala una niya litoka. Gipahiyuman lang gihapon niya ang batan-on. Si Tete Manto uyoan ni Mira, kapikas ni Rudy. Lima ka tuig nang patay. Kining mitimbaya kang Rudy piho nga gikan sa laing lugar ug wa na kaanhi sa Carmen sa dugay nang panahon. Way kasayuran sa nahitabo kang Tete Manto.

“Okey lang, Dong. Wa mausab ang kanindot sa buntag bisag dili ta kaila,” ni Rudy nga nagpahiyom gihapon.

“Sige, Sir. Salamat, Sir!” sa batan-on nga mipasirit sa iyang motorsiklo padulong sa merkado.

Gisundan ni Rudy paglantaw ang motorsiklo samtang misugod paglakang gikan sa iyang gihunongan. Mihukom siya kaganina nga dili lang pahibaw-on ang batan-on nga patay na si Tete Manto, kay segurado gyud nga madaot ang buntag niya. Dili angay mausab ang kaanindot sa kabuntagon. (KATAPUSAN