World, reg’l title fights duwaon sa WBC Convention
Gibanabana nga moabot ngadto sa 600 ka nga guests ug mga participants nga naglakip sa mga top boxing officials gikan sa nagkalainlaing nasod ang motambong sa World Boxing Council (WBC) Asian Summit ug Third Annual WBC Women’s World Convention nga ipahigayon karong Nobiyembre 16-20 sa Philippine International Convention Center sa Pasay City.
Sa orihinal nga plano, ang Mexican City sa Culiacan mao unta ang host sa maong kalihukan, apan sa meeting sa WBC Board of Governors didto sa Kiev, Ukraine niadtong Septiyembre 30, ang Pilipinas nga girepresentahan ni Games and Amusement Board chairman Abraham Kahlil B. Mitra, surprisang mipahibawo sa ka- daghanan nga andam ang nasod sa pag-host sa maong event.
Ang maong tanyag wala makasugat og mga pagbabag ug sa samang higayon nakapamatuod kini sa suporta ug kaaktibo sa nasod sa mga kalihukan sa WBC. Si Mitra, kanhi usab gobernador sa Palawan, mao usab karon ang International secretary sa WBC.
Niadtong 2016, sa 141 ka mga nasod, ang WBC mipasidungog sa GAB-Philippines isip Commission of the Year - unang higayon nga nadawat sa maong buhatan sa maong pasidungog.
Kini nagagumikan sa paghatag sa maong ahensiya og libring medical check up ngadto sa mga professional boxers pinaagi sa pagpakigtambayayong sa Department of Health (DOH).
Atol usab sa maong convention, ipahigayon usab ang usa ka WBC Silver World Super Middleweight championship, tulo ka regional championships (WBC) Asia Female Bantamweight title, WBC Continental Asia Minimumweight title ug WBC Asia Superflyweight title) ug usa ka international Muay Thai ug laing usa ka National Muay Thai fight.