SUERTE MANGITA’G SUWERTE SA MANILA
Human niya natabangan ang University of the Visayas (UV) Green Lancers nga makabaton og laing Grand Slam title sa Cebu Schools Athletic Foundation Inc. (Cesafi) college basketball ning bag-uhay lang, ang 2-time MVP nga si Rey Suerte manimpalad na sa laing suwerte, ning higayuna sa mas dako nga liga sa Manila.
Ang lumad nga taga Monkayo, Compostela Valley Province nagpaingon na sa direksyon nga makaduwa sa Philippine Basketball Association (PBA) Develomental League o mas naila nga D-League.
Si Suerte, kinsa mao pa’y pag-24 anyos niadtong Oktubre 4, aduna pa unta’y nahabiling usa ka tuig nga
makaduwa siya sa Cesafi apan nakahukom kining dili na motiwas niini ug manimpalad na sa Manila.
“Opportunity na man gud ni, i-grab na ni nako,” matod ni Suerte, kinsa mao sab ang All-Star MVP ning tuiga sa Cesafi.
Gibutyag ni Suerte nga adunay ubay-ubay nga basketball agents sa Manila ang ningpadayag og intensyon nga mogiya kaniya sa bag-o niyang sagubangon apan ang labing pursigido mao ang kanhi coach nga si Edgar Macaraya.
Asoy ni Suerte nga gisultihan siya ni Macaraya nga ang team sa D-League nga interesadong mokuha kaniya mao ang Che’lu Bar and Grill Revellers.
“Naghuwat lang mi sa rookie drafting sa D-League, mura’g kuhaon man kuno ko sa Che’lu,” dugang ni Suerte.
Ang desisyon ni Suerte nga moduwa sa D-League gisuportahan sa UV management ug coaching staff.
“Ang atoa gyung priority is maka-graduate ang atong players. Naka-graduate na man si Rey, so wala na’y problema. All out support mi niya,” matod sa tag-iya sa team nga si Congressman Gerald Anthony “Sam-Sam” Gullas.
“Daghan na sab siya’g nahatag sa atong school. We’re
hoping nga maka-succeed sab siya sa bigger leagues sa Manila.”
Abunda gyud nga suwerte nga ning-abot sa kinabuhi ni Suerte gumikan kay gawas sa
individual awards ug tulo ka mga kampiyunato nga iyang nadawat isip usa ka basketbolista, ni-graduwar sab siya sa kursong Human Recource Development Management karong tuiga.
Si coach Gary Cortes nagkanayon nga hinog na ang abilidad ni Suerte ug angayan na kining mohamag sa mas malisod nga pagsuway.
“Angay na gyud namo siyang buhian. Opportunity na ni Rey, dili na namo ihikaw niya,” asoy ni Cortes.
Sa dili pa siya moduwa sa D-League, si Suerte motabang una sa Green Lancers sa katapusang higayon sa umaabot nga Philippine Collegiate Champions League (PCCL) Elite 8.
“Moduwa pa man seguro ko sa PCCL. After ana, basin muadto nako sa Manila,” matod ni Suerte.
Nanghinaot si Suerte nga matabangan niya ang Green Lancers nga makapakita og maayong performance sa PCCL diin magtagbo ang nanag-unang collegiate teams sa tibuok Pilipinas.
Ikatulong puwesto maoy labing taas nga naabot sa Green Lancers sa torneyo.