15T ka kilong basura sa Cebu City
Niabot sa 12 ngadto sa 15 tonelada nga basura ang nahakot sa Department of Public Services (DPS) sa siyam ka mga menteryo sa dakbayan sa Sugbo atol sa paghinumdom sa Adlaw sa mga Santos.
Si John Paul Gelasque, assistant department head sa DPS, nagkanayon sama sa naandan, nag-una sa labing daghan og basura nga nakuha mao ang pampublikong sam-ang sa barangay Carreta ug Calamba ug gisundan sa Queen City Memorial Garden.
Ang mga personnel nga sakop sa DPS wa maglisod sa paghakot sa basura sanglit adunay lugar sa menteryo nga gihimong dumping area basura ug nindot usab ang panahon sanglit way uwan.
Matod pa ni Gelasque nga sukad niadtong Oktubre 31, 24 oras adunay mga street cleaners ang gidestino sa mga public cemetery aron maoy moasikaso sa kalimpyo sa lugar.
Sa miaging tuig, ang basura nga nahakot sa DPS wa niminos sa 15,000 ka kilo gikan gihapon sa maong mga sam-ang.
MIMINOS
Disiplinado na ang kasagaran sa mga tawo nga nituyo ug anaa nakapalibot sa mga samang sa dakbayan sa Mandaue.
Kini ang paghulagway sa kasagaran sa mga nagpatuman sa kaluwasan, sa kahapsay sa trapiko, ug bisan na sa mga manglimpyuhay, may labot sa pagsaulog sa Kalag-kalag sa syudad.
Bisan sa kainit sa panahon, ang grupo sa mga manlimpyuhay nga sakop sa Deparment of Public Services (DPS) sa Mandaue City hall mapahiyumon ra nga nanilhig sud ug gawas sa sam-ang ug nangolekta sa mga basura sa mga namaligya sa gawas sa upat ka mga sementeryo sa may barangay Guizo.
Gitug-an ni Julie Patindol sa Superbalita Cebu nga wa kaayo silay basura nga gisunod sa pagpanilhig sud ug gawas sa sam-ang, kay ang mga manindahay insaktong paghipos sa basura ang gihimo hinungdan nga mas dali ang pagkolekta.
Si Patindol siyam na ka tuig nga sakop sa DPS.
Gani, matu usab ni Denzil Banes, usa sa mga eco enforcer sa Mandaue City Environment and Natural Resources office (MCENRO) nga sa mga sementeryo lang sa Barangay Guizo, ni-menus ang nakolektang basura ikompara sa niaging tuig.
Kon sa Kalag Kalag sa 2017 niabot og walo ka garbage truck ang nahakot nga basura, ning tuiga upat na lang.
Wa’ usab nahimong problema ang Traffic Enforcement Agency of Mandaue (TEAM), di susama sauna, menus karon ang mga nanagda og sakyanan sa mga moduaw sa sementeryo.
Matod ni Glenn Antigua, pangu sa TEAM, nga kasagaran magpa-drop na lang duol sa sementeryo, ug wa nay mo-park pa.
Nisunod ra usab sila sa lagda sa dan. Mapasalamaton sila sa TEAM nga wa silay natala nga disgrasya sa dan, sukad Nobyembre 1 hangtud kagahapon sa udto, Nobiyembre 2.