Kasinatian sa kalag-kalag

Nagkadaiyang kasinatian sa nakalabay'ng kalag-kalag gipabuhagay sa social media.

Dunay nahimout, duna say naglagut. Kasagaran sa gipamungtan og maayo mao ang sakay nga hilabihan ka apiki. Dihay panawagan nga masayo og pauli sa probinsiya aron malikayan ang kahasol diha sa mga pantalan, airport ug bus terminal.

Sa tinud-anay lang kinsa man guy gusto nga ma-stranded og dugay kong di pa lang apiki sa panahon. . Ang uban duna pay trabaho nga giatiman mao nga di ka dali-dali og biyahe'g sayo. Mao nga sa sunod mapaabot ang susamang sitwasyon. Karambola sa mga dapit diin nagtapok ang daghang pasahero. Mas labaw nga nagping-it sa kalulisod kadtong igo ra ang bawon nga pamlite. Nakaabot man tuod sa ilang padulngan ug nakapanagkot apan nagkutoy ang tiyan. Ang akong gikaloy-an og maayo ang mga bata og tigulang. Ang sakto nga paagi sa akong pagtoo, di nalang gyud mopugos og biyahe kong apiki na sa panahon. Kong di ka biyahe og sayo di nalang sab mamasin nga makasakay.

Mas maayo pang magpuyo nalang sa balay.

Atong pasalamatan ang mga tinugyanan sa balaod sama sa kapulisan, barangay tanod ug force multiplier sa malinawon nga selebrasyon. Gawas sa ginagmayng kasikas sa pipila ka sam-ang, gideklarar sa PNP nga hapsay ang kalag-kalag dinhi sa ato.

Ang di lang hapsay mao kadtong mga pamilya nga hangtod karon padayon pang gilalisan ang kuwarta nga napildi sa mga tigbakay nga mao say uso sa mga okasyon sama sa kalag-kalag. Kanang kuwarta nga kompurmiso nang daan unya ipamasin sa tigbakayan o bulangan, kanunay gyud nang kaluhaan og away. Kong makadaug man gani daghan sab kaayo ang manghasol og pabor. Usahay mahurot ra sab sa inom.

Nagsugod na ang kisaw sa politika. Mao sab ron ang panahon nga sugdan nato pag-ila ila ang mga kandidato. Ilabi na niadtong mga bag-ong nawong sa politika. iay pasidaan alang sa mga bag-o, di malikayan nga makasugat mo og mga pagsaway.

May mga intriga nga maghisgut sa imong kagahapon. Ang nindot himoong bati sa imong mga kontra. Ang pait kay madahig pa gyud ang imong pamilya.

Mao na ang politika kaniadto hangtod karon. Moapil gani ka, gawas nga molugwa ang imong katapusang sensiyo, mahilam-os pa gyud ka sa daghang isyu. Bisan di imong binuhatan lakip ka nga pasanginlan.

Mao na ang politika. Sa makauna lang og ataki. Punan pa sa social media. Dali rang mag post og bati nga sugilanon aron dauton ang imong pagka tawo.

Sa imong mga supporters nga di kapugong dakong lalis ang paabuton.