10 nasikop sa drug busts sa kapulisan

Napulo ka mga tawo ang nasikop sa managlahing gipahigayon nga anti-drug operations sa Metro Cebu, sukad niadtong Nobiyembre 3 hangtud kagahapon sa kaadlawon diin duha niini babaye, ang usa giingong bag-uhay lang nakagawas sa prisuhan.

Usa sa mga dinakpan giila nga si Angie Alburo, 28, lumad nga taga Barangay Pulpogan, lungsod sa Consolacion ang giila sa Mandaue City Police Office nga high value target.

Nasikop kini kagahapon sa kaadlawon, Nobiyembre 4, atol sa gipahigayon nga checkpoint sa may dan A. Soriano, Brgy. Centro, dakbayan sa Mandaue.

Matud ni P/CInsp. Aldrin Villacampa, hepe sa Centro Police station, nga sakay sa habal-habal si Alburo dihang gipara suway una niini ilabay ang mga pakete sa gidiling drugas, nakuha sa dinakpan ang tulo ka gagmayng pakete sa shabu.

Si Alburo nasuta nga ning buwana lang nakagawas sa Cebu City jail human kini madakpan niadtong 2015 sa Brgy. Pulangbato, tungod gihapon sa pagpamaligya sa gidiling drugas.

Giingong gikan sa siyudad sa Sugbo si Alburo ug padung unta sa dakbayan sa Lapu-lapu.

Laing dinakpan atol sa checkpoint sila si Rasjag Quidlat, 20, taga Las Pinas City ug kauban niini nga nailang si Giorlie Moradas, 26, taga Cadiz, Negros Occidental, luwan sila og taxi ug nakuhaan og tag-duha ka pinakete sa gituohang shabu.

Sutaon pa sa kapulisan ang background sa duha.

Nasikop usab nga sakay og taxi ang usa ka Prince Val Tunacao, 33, taga Barangay Looc, siyudad sa Mandaue, nakuhaan kini og duha ka paketeng shabu.

Nasikop usab sa Talisay City Police Station ang upat ka mga tawo, Ang nasikop mao silang Joradin Diaz alyas Opaw, taga Brgy. Candulawan, dakbayan sa Talisay, Don Anthony Gapasin, 26, taga Dumlog, Talisay City, ang duha nasikop sa managlahing buy bust operation niadtong Nobiyembre 3 sa hapon.