“Blessing” sa puti nga babaye
Lain-laing komento ang akong nadawat kabahin sa lindog sa babayeng puti sa DA regional office 7. Matod sa usa, wala kuno matiwas. Kulang man, matod pa.
Matod sab sa usa ka amigo, dunay gihimo nga pag-blessing sa maong lugar dili pa lang dugay. Tuyo tingali mao ang paghingilin sa maong linalang.
Ang pangutana mao kini. Mahimo bang hinginlan ang maong linalang pinaagi sa “blessing” nga gihimo sa usa ka pari?
Sa akong pagtuo, dili. Ngano man?
Kon ang tuyo mao ang pagpapahawa, dili “blessing” ang himuon.
Exorcism ang buhaton. Sama sa gihimo ni Kristo nga pagpapahawa sa yawa sa lawas sa usa ka tawo nga giyawaan kaniadto.
Dakong kwarta ang nahimo sa simbahang katoliko sa miaging pagsaulog sa kalag-kalag.
Sa usa ka lungsod nga akong nahibaw-an, nangayo ang simbahan og P110 sa tulo ka kalag nga pamisahan. Kon molapas sa 3, mobayad ang nagpamisa og P25 kada kalag.
Kon magpamisa ka og daghang kalag, mobayad sab ka og dako-dako nga kantidad.
Nganong magpamisa man ta og kalag?
Aron matabangan nga mahilangit o mahiluna ang atong kalag nga pamisahan, mao kini ang sagad pagtoo sa uban.
Ang uban sab, aron matuman nila ang ilang gipanaad sa mga minahal nga mitaliwan na.
Ang uban, aron makompleto ang ilang pagbisita sa sementeryo.
Ang pangutana, makatabang ba ang pamisa aron mahilangit o mahiluna ang kalag sa namatay?
Dugang pangutana, kinahanglan ba nga mobayad ang nagpamisa alang sa tagsa-tagsa ka patay nga pamisahan?
Kon walay bayad, epektibo ba gihapon ang pamisa?
Kon modawat og bayad sa pamisa ang simbahang katoliko, matawag ba kini og negosyo o apil lang kini sa ilang trabaho nga mao ang pagsaulog sa pamisa?
Ngano nga ang ubang lungsod libre ang pamisa, ang uban dunay bayad? Kinsay nagbuot sa ibayad? Unsay gibasihan sa bayad?
Didto sa Bohol, dunay duha ka certificate of nomination and acceptance (CONA) nga gi-isyo ang PDP-Laban sa pagka-gobernador sa Bohol.
Ang usa gipirmahan sa kampo ni Koko Pimentel, ang ikaduha gipirmahan sa kampo ni Atty. Rogelio Garcia.
Masabot lang kini sanglit nagkagubot ang PDP-Laban karon tali sa grupo ni Pimentel og Garcia. Gani, dunay kaso nga gisang-at sa Comel;c Manila mahitungod niini.
Apan dunay lisod masabtan. Dunay 2 ka CONA nga gipirmahan ang grupo ni Koko Pimentel alang sa 3rd District Representative sa Bohol.
Ang usa gipirmahan ni Koko Pimentel og ang ika-duha gipirmahan ni Atty. Salvador Ty nga sakop ra sab ni Koko Pimentel. Unsay buot ipasabot niini? Asa niining 2 ka CONA ang tinuod, ang gipirmahan ni Koko Pimentel o ang gipirmahan ni Atty. Ty?
Nganong nahitabo man kini?
Nahibalo ba si Koko Pimentel niini?