Trust is not enough
Kapoy ang paminaw ko sa akong lawas. Misulod dayon ko sa akong kuwarto. Diha na si Lorena, ka-boardmate nako. Nagbasa siyag libro apan mihunong siya sa pagbasa pagkakita nako. Iyang gitak-op ang libro ug milingkod siya sa ngilit sa iyang higdaanan.
Usa ra ka double deck ang among katulganan kay gamay ra man ang kuwarto. Suod ming amiga si Lorena kay nagkauban mi sa maong boarding house three years na. Parehas ming third year college. Usa ra ka university ang among gitunghaan apan lain-lain ang kurso nga among gikuha.
“Komusta ang inyong date ni Rod?”
Nag-smile si Lorena. Mikidhat pa gani siya nako. Nakaila si Lorena sa akong boyfriend kay schoolmate man namo kini.
“Aw, as usual enjoy.” Mikatawa ko apan sa sulod sa akong dughan diha ang gibati kong kaguol.
Kinsa man say di maguol? Nagdali-dali kog desisyon. Yano ra kaayo nakong gihatag kang Rod ang akong lawas? Gawas ani, naguol sab ko nga naghunahuna nga basig momabdos ko. Na, unsa kahay buhaton sa akong mga ginikanan nako, no? Naglaom ra ba sila nga makahuman gyud kog kurso aron makakita kog maayong trabaho ug makatabang og gasto sa duha ko ka manghod nga nag-eskuwela na sa hayiskol sa among lungsod.
Unya mikanaog si Lorena sa iyang higdanan. Sa itaas ang iyang puwesto samtang ako naa sa ubos. Mitupad siyag lingkod nako sa ngilit sa akong higdaanan. Mitan-aw siyag dugay nako. Nakaduko ko. Wa ko makatan-aw og diretso sa akong amiga.
“Nganong guol man nang imong nawong, Belen? Giaway ka ni Rod? Tug-ani ko kay kumuton ko ang iyang nawong ugma sa eskol.”
Seryuso na si Lorena. Nag-isipay ming magsuon.
Wa na ko makaantos sa gibati kong kaguol. Migakos ko kang Lorena. Mihilak ko sa iyang dughan. Ug dihang medyo miluag-luag na ang kahuot sa akong dughan, gitug-anan ko si Lorena sa tanan.
Gkuptan ni Lorena ang duha ko ka abaga ug iya kong gipaatubang kaniya.
“Nahitabo na kana, Belen. Wa na tay mahimo. Manghinaot lang ta nga mobarog si Rod sa iyang love nimo. Pero sultihan ta lang gihapon ka nga ang pagsalig di igong katarongan aron ihatag mo ang imong lawas kaniya.”
Nakapanghupaw ko. (SUMPAYAN)