1 KILO SHABU HALIN SA MISIS

MATAG SEMANA PAGPULI SA BANA NGA NAA SA JAIL; SUSPEK GI-BUY BUST SA HOTEL

Ang asawa sa usa ka dako nga drug pusher sa Barangay Tejero, siyudad sa Sugbo, nakuhaan og P2.8 million nga balor sa illegal nga drugas kaadlawon sa Huwebes, Nobiyembre 8, sulod sa usa ka hotel sa Cebu City.

Lakip sa nasikop ang iyang mga kauban nga maoy tigbaligya og drugas sa mga langyaw nga kustomer sa gawas sa hotel.

Sa kinatibuk-an, mokabat sa P5.2 milyunes nga illegal

drugs ang nasakmit sa Cebu City Police Office sa managlahing mga operasyon sa siyudad sud sa 36 oras.

Ang nadakpan giila sa mga pulis nga si Mary Jane Dequitos, 36, taga Villagonzalo 2, ang target sa buy bust operation.

Nasikop sab sila si Geramae Niala ug ang uyab nga si Jhon Frye Tapales ug Carlton Estrera, lapida maker, nagpuyo sulod sa Carreta cemetery, apan lumad nga taga San Francisco, isla sa Camotes.

Matod ni Chief Inspector Eduardo Sanchez, hepe sa Abellana Police Station, nga adunay nakabantay nga pulis nga ang usa ka langyaw giagni sa usa ka babaye nga mopalit og shabu.

Gipakita pa sa palad niini ang putos sa shabu hinungdan nga iya kining gidakop ug giimbestigar.

Nitug-an kini nga ang drugas gikan sa usa ka babaye nga naka check in sa usa ka hotel sa Llorente St., Cebu City nakig-alayon dayon sila sa management aron sak-on ang kwarto. Nag-buy bust operation dayon sila sa gawas sa lawak, diin nag-abang si Dequitos.

Sa dihang natunol na ang usa ka pakete sa gituohang shabu, nipaila dayon silang pulis.

Sa pag abli sa pultahan, ilang nakita ang nagpasad nga pinutos sa gituohang shabu sa kama sa kwarto sa hotel.

Dugang ni Sanchez nga wa nalakip sa ilang lista si Dequitos sanglit nagpuyo kini sa Villagonzalo 2 nga di ubos sa ilang hurisdiksyon.

Ilang nasayran nga niadtong Miyerkules ni check-in si Dequitos sa hotel base sa mga sapot nga ilang nakuha sa bag niini.

PILAY MAHALIN

Human mabilanggo ang iyang bana nga si Julius Dequitos, kinsa giila nga labing dako nga drug pusher sa Tejero, si Mary Jane na ang nipuli sa pwesto.

Sa ilang impormasyon nga nakuha, makabaligya si Mary Jane og 1 kilo matag semana.

“Sa atong information siya ang nipuli sa iyang bana nga napriso na pud. Maka baligya ni siyag 1 kilo kada semana,” matod ni Sanchez.

Nagtuo siya nga sa mga hotel mamaligya si Dequitos tungod kay luwas, di dayon mamatikdan.

Apan ang mga kawani ug security sa hotel nga di lang magpahingalan nagduda na nga adunay illegal nga kalihukan si Dequitos tungod sa kadaghan sa mga tawo nga mosulod ug mogawas.

Aduna pay mag motor nga mosulod bisan sa lawom nang gabii ug pipila ka minutos ang molabay manggawas.

Hugot nga gihimakak sa mga suspek nga namaligya silag illegal nga drugas kay alang ni Mary Jane didto sila sa hotel aron unta moduaw sa iyang bana nga naa sa Cebu City Jail.

SUD SA 36 ORAS

Apan wala kini makatubag nganong nag check-in sila ug nganong nakuhaan silag mga pinutos sa illegal nga drugas.

Sa laing mga operasyon, mokabat sa 170 gramos sa shabu nga gibana-banang mobalor ang tanan og P2.4 milyunes nasakmit sa uban pang mga operasyon sa uban pang mga buhatan sa CCPO.

Lakip sa mga nasikop giilang mao si Ian Paul Bontilao Cabarrubias, 35, minyo, way trabaho, taga Bacayan, siyudad sa Sugbo.

Ang nakuha sa grupo nila ni Sr. Inspector Alvin Llamedo ug mga kauban sa Police Station 8 naglakip sa unom ka pakete nga gibana-banang motimbang og 25 gramos sa gituohang shabu nga mobalor og P295,000 ug usa ka kalibre .22 nga revolver. /