Bidding alang sa 20-ka-andanang building sa Kapitolyo ipahigayon
Bidding alang sa gitinguha nga 20 ka andanang Provincial Resource Center sa Kapitolyo, madayon na karong adlawa, Nobiyembre 9.
Gipaniguro sa Bids and Awards Committee (BAC) nga bukas kini sa media ug sa publiko ug wala sila’y itago sa pagpili sa kontraktor nga maoy mohimo sa proyekto.
“Wa’ man tay gi-bar gyud ana. Wa’ man ta’y direction nga di magpasulod og bisan kinsa. If someone is interested to drop by,
okay ra man,” niingon si Jone Sepe, vice chairman sa BAC.
Matod ni Sepe, nga atol sa pre-bid conference kapin usa ka semana na ang nakalabay, dunay pito ka mga bidder ang nipadayag ug interes sa proyekto.
Dugang niya nga niadtong Lunes, Nobiyembre 5, duna nay 2 ka mga kontraktor nga hingpit nang nakapalit ug bid forms alang sa bidding ugma.
Sigun ni Sepe, nga atol sa bid opening, susihon sa BAC kon kumpleto ang technical, legal ug financial documents sa mga bidder. Kinahanglang anaa ang tanang gikinahanglang dokumento aron dili ma-disqualify.
Kon wa’y problema ang ilang mga dokumento, hayan nga adto kini magdaog sa kung kinsa ang mohatag sa lowest calculated bid.
“Kung daghan sila nga mo-submit, i-rank nato na sila based on the amount that they have offered. Diha na ta mo-determine kinsay lowest calculated bidder. And then ug kinsa to’y lowest calculated bidder, kung wala’y objection they will be subjected to post-qualification process,” pasabot ni Sepe.
Wala isalikway sa BAC ang posibilidad nga dunay failure of bidding, ilabi na kon dunay kuwang nga dokumento ang mga mosalmot nga bidder karon.
Moabot sa P1.5 billion ang approved budget for the contract.
Subay niini, nang-loan ang Kapitolyo og pundo gikan sa Development Bank of the Philippines (DBP) aron maoy igasto alang sa proyekto nga modernong edipisyo sa Capitol compound.