Kinsay nabulahan sa basura?

Sa giduso nga budget sa 2019, ang Department of Public Services (DPS) sa Cebu City milakip og budget sa pagpalit og 21 ka compactor trucks aron magamit sa paghakot sa mga basura, sa ingon makadaginot ang Siyudad og pundo. Sa miaging tuig, labing minos P300 milyunes ang gigasto sa Siyudad sa paghakot sa basura. Karong 2018 misulbong pa kini ngadto sa P420 milyunes nga taas ra sa gasto sa kanhi administrasyon ni kanhi mayor Michael Rama nga P135 milyunes.

Sa wa pa mahimong mayor si Osmeña, usa ni sa iyang isyu batok kang Rama. Apan sa iyang administrasyon, gipilo pa hangtod makalima ang iyang gasto sa paghakot sa basura.

Ingon pa sa DPS, kon mapalit ang compactor trucks, sa 2020 mamahimo na lang nga P140 milyunes ang magasto sa Siyudad sa basura kay ang kagamhanan na man ang mangunay sa paghakot.

Nganong karon na man lang kini giduso sa DPS? Nganong wa man kini buhata sa miaging tuig nga unta makadaginot man kaha ang Siyudad? Nganong karon pa man ni nga hapit na mapupos ang termino ni Osmeña?

Tiaw mo na, di mominos sa P250 milyunes ang nausik sa Siyudad sa pagsigeg hakot sa mga basura gamit ang pribadong kompaniya nga unta naa man diay paagi nga makadaginot. Di na ra ba mabalik ang mao nga pundo nga magamit unta sa ubang importanteng mga proyekto sama sa flood control.

Kining proposal sa DPS nagpakita nga kining mao nga administrasyon palpak sa pagdumala sa paghipos sa mga basura kay nag-usik sa dakong kwarta.

Yuna pa, wa ba kahay nalipay aning palpak nga pagdumala sa paghakot sa basura? Di kaha ni tinuyo nga piyungan lang ang kadako sa kwartang nagasto sa pagpanghakot sa basura? Kinsay nalipay, kana kon naa man? Mga pangutana lang ni.