Pag-ilis sa ngan sa airport nagyagaw
Morag nagyagaw ang mga lakang sa pagilis sa ngan sa Mactan-Cebu International Airport (MCIA). Ang House committee on transportation mipasar ning bag-o lang sa House Bill (HB) 8170 nga mag-usab niini ngadto sa Lapu-Lapu Cebu International Airport (LCIA).
Apan gipasar ang maong balaudnon nga gipasaka ni Kongresista Raul del Mar sa Cebu City north district bisan way public hearing dinhi sa Sugbo. Tingali ang maong komitiba nagsalig nga kay usa kini ka bill of local application, nauyonan na ni sa mga Sugbuanon.
Wa sila magdahom nga dunay mosupak niini sama ni Presidential Adviser on Legislative Matters Adelino Sitoy, usa ka kanhi mayor sa Cordova nga sakop sa Mactan ug gustong ibutang ang Cordova sa bag-ong ngan sa airport.
○○○
Si Kongresista del Mar niingon nga gusto nilang ipabilin ang ngan nga Mactan-Cebu International Airport. Apan kon usbon man gani, ang ilang gusto mao ang Lapu-Lapu Cebu International Airport, di tangtangon ang Cebu.
Ang National Historical Commission (NHC) nisugyot man gud nga usbon ang ngan sa airport ngadto sa LapuLapu International Airport agig pasidungog ni Lapu-Lapu, ang unang lumad sa atong kaislahan nga nakabuntog sa usa ka langyaw nga buot mosakop kanato apan naila na hinuon nga usa ka matang sa isda.
Matod pa ni del Mar gipasaka nila ang HB 8170 sa House of Representatives aron pag-amendar sa Republic Act (RA) 6958 nga nagmugna sa Mactan-Cebu International Airport Authority (MCIAA) isip objection sa sugyot sa NHC.
Apan madungog pa kaha ang mga Sugbuanon kon unsay ilang gustong bag-ong ngan sa Mactan airport? Masumpay pa kaha ang Cordova nga maoy agi-agian sa mga eroplano matod pa ni Sitoy?
Si Kongresista Peter Calderon (Cebu, seventh district) niingon nga kay gipasar man ang maong balaudnon sa House committee on transportation, modiretso na kini ngadto sa plenaryo, sa kinatibuk-an sa House of Representatives, bisan way public hearing.
Pero yuna pa, hain kamaayo kon unahon sa atong mga opisyales ang ikaduhang runway sa Mactan airport? Bahala nag unsay ngan basta di lang magtrapik ang mga eroplano sa maong airport.
Ang House committee on transportation mipasar ning bag-o lang sa House Bill (HB) 8170 nga mag-usab niini ngadto sa Lapu-Lapu Cebu International Airport (LCIA).