Kandidato nga ilisdan
Daghang naglibug o kaha wa pa kahibawo nga ang Commission on Elections (Comelec) resolution 10420 nga na-promulgate niadtong Septiyembre 7, 2017, naamendar na diay sa Comelec resolution 10430, pinitsahan og Oktubre 1, 2017.
Kining resolution 10420 maoy naghatag unta og kahigayunan sa mga kandidato nga mo-withdraw, mamatay ug ma-disqualified by final judgment nga ma-ilisdan sa iyang partido political o koalisyon og laing kandidato bisan sa mismong adlaw sa piniliay. Apan ang resolution 10430 wa na magtugot nga mailisdan ang mo-withdraw nga kandidato nga di na gustong mopadayon sa iyang kandidatura lapas sa Nobiyembre 29.
Uyon ako nga gi-amendar sa Comelec ang mao nilang resolusyon nga gisaway sa daghang mga tawo labi na ni kanhi Comelec chairman Sixto Brillantes, Jr. Magamit man gud kini og tinunto sama sa pagpadagan og mga artista nga pareha og apelyedo sa buot mo-substitute kaniya nga mi-file sa iyang certificate of candidacy (C0C) niadtong Octubre 11 ngadto sa 17, nga milabay. Daku kaayog kahigayunan nga mapili ang mga tawo nga wala ka makaila kay nagtuo kang siya gihapon ang kandidato nga mi-file sa COC. Daku king lingla.
Ang inyo nalang paabuton kon si kinsang mga mi-file sa COC ang ilisdan og laing kandidato karong Nobiyembre 29, nga maoy last day sa substitution. Anaa may mga dapit diin ang mga milansar igsuon o kaha anak sa ilang gituhoang mao gayud ang seryusong mokandidato. Nahitabo kini tungod kay wala pa tingali makombinsi ang maong tawo o kaha duna pay mga gimbuhaton nga dili niya buot dayong mabiyaan. Iya untang paabuton ang election day usa siya mopuli sa kapariha niya og apelyedo. Apan tungod niining Comelec resolution 10430 mapugos siya sa pag-substitute sa nagpaka-aron-ingnon nga maoy tinuod nga kandidato sa partido sa Nobiyembre 29.
Buot sa Comelec nga mopalabang og balaud ang kongreso sa pagbalik sa probisyon sa Omnibus Election Code of the Philippines nga nagdali sa premature campaigning kun pagpangampanya bisan dugay pa ang election period. Kining maong probisyon sa premature campaigning gihukman sa Supreme Court niadtong 2009, nga wala makalapas sa balaud. Ubos gud sa Republic Act 9369, ang tawo nga magpapili sa usa ka posisyon makonsiderar lang nga kandidato kon magsugod na ang campaign period.
Ang tumong ug tuyo gud niining maong balaud mao aron nga patas ang pagsugod sa pagpangampanya sa tanang mga kandidato og aron dili usab sila makagasto og dakung salapi nga ila ra usab nga bawion kon makalingkud na sila sa katungdanan. Sama ra usab kini sa pag-limit sa campaign spending.
Alang kanako atong pasagdan kining mga kandidato sa pagwariwari sa ilang kwarta aron motagam labi nag mapildi.