Trust is not enough
Nabalaka gyud ko, uy, nga naghunahuna nga basig momabdos ko. Na, hapit na motakdo nga usa ka buwan sukad nga gitugyan ko kang Rod ang akong lawas.
“Naunsa ka man, Belen, nga mikalit man lang sa pagkatarantar? Tan-awa, o, klaro sa imong nawong. Duna ka bay gikahadlokan?”
Mitindog ko. Miinom kog tubig sa pitsel kay morag miuga ang akong tutunlan. Unya giatubang ko si Lorena.
“Di gyud nako kalikayan nga mahadlok, Lor, kay mokalit lang pagtungha sa akong hunahuna nga basig mabuntis ko.”
Dugay kong gitutokan ni Lorena. Unya miyangu-yango siya.
“Aw, kon mahitabo na, Belen, anha na nimo maklaro kon mobarog ba gyud si Rod sa iyang kaakohan ug sa iyang love nimo.”
“Kon di, Lor, unsa may akong buhaton?” Kahilakon na sab ko. “Sultihan nimo ang imong parents sa tanan. Ayaw kahadlok kay sila ra gyud ang mosabot nimo. Aw, siyempre mahiubos sila nimo, kasab-an ka. Pero di ko motuo nga hangtod sa hangtod na lang gyud ang ilang kasuko nimo. Makapasaylo ra gihapon sila nimo.”
Nahilom ko ug miginhawa pag-ayo.
Miabot ang usa ka buwan. Puwerte nakong lipaya kay miabot ang binuwan kong menstruation. Sa ato pa, wa ko momabdos. Nalipay sab si Lorena. Samtang si Rod, akong gipakigsultihan bahin ani. Nalipay siya. Ug gisulti ko niya ang akong desisyon. “Di ko mosugot, Belen.” “Nganong di ka man mosugot nga duna ka na may laing uyab? Basta makigbuwag na ko nimo, Rod.”
Naglagot gyud ko kang Rod tungod sa pagpakigrelasyon niyag laing babaye ug sa wa na niya pagtagad nako.
“Di ka mosugot nga magbuwag ta kay wa man kay tulubagon nako? Wa man ko mabuntis? Gusto na sab kang makigsuod nako isip imong girlfriend? Wa na koy pagsalig nimo, Rod!”
Nataas ang akong tingog. Mitindog ko kay gusto ko nang biyaan si Rod. Diha mi sa sulod sa Jollibee. Wa ko ganahing mokaon sa akong lunch. Apan gikuptan ni Rod ang akong bukton.
“Mosugot ko nga magbuwag ta, Belen, kon sultihan ko nimo nga wa ka nay paghigugma nako.”
Mora kog natuk-an. Wa ko makatingog. Unsaon ko pagsulti kang Rod sa gusto niyang mahitabo nga bisag nakadesisyon ko nga makigbuwag niya apan love man gihapon nako siya?
(SUMPAYAN)