Bag-ong lawak
Human nako ipabungkag ang karaan kong kusina nakahigayon ang akong asawa pagtuman sa iyang laraw. Wa na ko maggunok; gipasagdan ko siya nga kanunayng nanighawak nagdiktar sa sinuholang tulo ka mga panday.
Bag-ong nakadawat ang akong asawa sa iyang 5-year lump sum human mo-retiro sa tunghaang publiko isip Science Teacher. Midagan ang duha pa ka mga buwan una nahuman ang among kusina diin ako may bag-ong lawak. Sa unang lawak tulo mi ang naggamit: ako, akong asawa ug kamanghuran kong anak babaye nga pinangga niya. Dalaga na kini ug silay magdulog sa usa ka katre.
“Duna na kay bag-ong lawak, Love, di na ka masamok sa imong pagsuwat-suwat diha.” Namulong ang akong asawa samtang nanilhig sa among hawanan.
“Di diay ta mag-usag higdaanan, Love”, mikidhat ko niya Morag nakasabot, nanlimuok. “Unsa, hangtod ron wa ka pa pul-i, kadaghan na sa atong apo?” Pintok niyang sulti. “Kami si Inday ang magusa sa pikas lawak.”
Wa na koy mahimo sa iyang hukom, igo na lang kong mitan-aw sa batiis sa akong asawa nga putig is-is gihapon bisan subra na sa 60 ang iyang edad. Bisan ingon sa wa nay pagtan-aw ang akong asawa sa ‘sex’ dako ang akong pagmahal niini kay hangtod karon wa gyud pul-I sa pagsilbi kanako. Buotan siya bisan malditag gamay.
Dako tuod kog higayon nga di masamok sa akong pagpangapkap og mga tema ingon man pagsuwat sa akong mga sugilanon ug balak. Wa madugay samok na kaayo ang akong lawak. Mikatag lang sa lamesa ang mga libro sa literatura. Dunay mga nobela nilang Ernest Hemingway ug Toni Morrison nga pulos mga nobel laureate. Sa tiilan sa akong hamugawayng katre makita ang mga libro sa mga sugilanon ug balak nilang Lam Ceballos, Mel Allego, Urias Almagro, Merlie Alunan, Butch Bandillo, Gremer Chan Reyes, Mike Obenieta, Adonis Durado, Josua Cabrera, Jeremiah Bondoc, Raul Moldez, Israel Ybanez ug ang akoa. May gamay kong bookshelf nga napuno sa mga libro sa mga foreign author.
Sa kilid, tupong na sa tawo ang file sa mga mantalaang Superbalita ug SunStar. Nag-subscribe man ko sa Carcar SunStar office. Sa unahan gitapok nako ang mga libro sa okultismo nilang Alice Bailey, Jaime Lichauco ug Mario H.Garcia. Sa atbang ang philosophical books nilang Henry James ug Arnold Toynbee. Mga inspiring books nilang Kahlil Gibran ug Eckhart Tolle didto sad. Sa akong uhan ang mga file sa akong mga sinuwat sa Philippine Free Press, Graphic, Womens Journal, Focus Philippines, Bisaya ug Superbalita.
“Unsa gud ning imong lawak, Pa, nagkagubot man lang sa mga libro. Nabasa na nimong tanan?” Pangusisa sa akong anak nga si Emily nga miduaw nako.
“Gisuwayan pero di mahimo tungod sa ako karong kanap nga mata.” Daghan na hinuon kong nabasa sa mga libro karon nga ania ko sa akong bag-ong lawak.”
Sa bag-o kong lawak sakay sa kahilom kanunayng manuktok ug modayon ang handurawan. Kausa, atol miablig kalit ang akong apo nga kiat. “Gutom, Lo.”
“Lo, ayaw paghinuktok, uy, naguol ka nga wa sugta ni Vicenta?” Wa ko motingog sa akong kamanghurang apo nga mikuha sa akong biskuwit sa taro. Kanunay siyang makakita man gud nga mag-estorya mi sa biyudang silingan nga 40 ang edad apan mistisahon. Kanunay ni mohuwam nakog kuwarta. Di masuko kon hikapon nako ang hawak.
Ganihang buntag nagyawyaw ang akong asawa, morag nangabubho sa biyuda. Da, tagam lagi ka, nganong maglaig katulog? Sunod adlaw nanilhig ang akong asawa sa bag-o kong lawak nga kanunayng nagpasiklap nako. Mipahiyom ko sa hilom. Nakasabot ko. (KATAPUSAN)