MERALCO, PHOENIX MAGTIWAS

Hugot ug pisikal nga kombati maoy gipaabot nga masaksihan karong gabii sa dihang magtiwas ang Meralco Bolts ug ang Phoenix Petruleum Gas sa ilang quarterfinals match sa nagkainit nga PBA Governors’ Cup sa Smart Araneta Coliseum.

Ang Bolts mibuntog sa twice-to-beat nga Fuel Masters sa ilang quarterfinals matchup niadtong Miyerkules, 90-74, didto sa Cuneta Astrodome nga naghatod ngadto sa ilang do-or-die match diin ang modaog maoy mosakbang sa nagpaabot nga Alaska Aces alang sa best-of-five semis.

Sa kasaysayan sa PBA, sa 113 ka mga teams nga naghupot og twice-to-beat advantage 101 niini ang nakalusot sa sunod round ug kini maoy dakong hagit ni Meralco headcoach Norman Black.

Sugdan ang kombati sa alas 7 ang takna sa gabii.

Depensa maoy gitutokan karon ni Black batok sa Fuel Masters kinsa maoy ikaduha karong team sa lega sa opensa human kini mag-average og 106.1 puntos matag duwa.

Apan sa Game One, ang Bolts nakamaniho sa pagpakgang sa Fuel Masters nga maoy hinungdan nga igo lang silang mitapos sa first half sa 33-35 nga score - pinakaubos nga halftime score sa conference ug layo ra usab kaayo sa average sa Phoenix.

Bisan sa kadaugan, si Black mapahimatngunon ngadto sa iyang batos nga duha ang ilang gikinahanglan nga daog ug wala pay angay iselebrar aron makasulod sila sa semis.

Kini maoy ikaduhang pagsuway sa Fuel Masters nga makasulod sa semis - butang nga wala pa mahimo sukad sa ilang pagsalmot sa PBA - ug laing higayon nga dili angay nilang palabyon.