Saktong binukbokay sa Minglanilla ugma
Saktong binukbokay sa kumo maoy masaksihan ugma sa gabii sa dihang ipahigayon ang Idol 4 Boxing Series sa Minglanilla Sports Complex, lungsod sa Minglanilla.
Kini human magbinaharay ang duha ka protagonista nga sila si Melvin “Gringo” Jerusalem sa Ala Boxing Gym ug ang two-time world title challenger
nga si Toto “Muscovado” Landero sa Muntinlupa City sa ilang main event fight.
“Pulos mi nag-training ning awaya. Pulos sab mi andam. Pero adto ra mi maghukmanay ibabaw sa ring,” matod ni Jerusalem atol sa press
conference kagahapon nga gipahigayon sa Abuhan Restaurant sa N. Bacalso Avenue, dakbayan sa Sugbo.
Si Landero, sa iyang bahin, mipadayag usab sa iyang kaandam.
“Kahibawo ko nga nindot ninga awaya. Mao nga ako gyud ning gipangandaman. Sakto ko sa training para ani,” nagkanayon si Landero.
Dili bag-o ni Landero ang pag-away dinhi sa Sugbo sanglit sa niaging tuig dinhi niya pakaginga Vic Saludar, ang kasamtangang world champion karon sa minimum weight division.
Si Jerusalem mao karon ang No. 4 sa WBC nga may 13-2, 8KOs nga baraha samtang si Landero adunay 10-3-2, 1KO nga record.
Si Edito Villamor, ang chief trainer sa Ala Boxing Gym, mitug-an nga importante alang sa duha kining maong away kay mao kini mopasaka sa ilang tagsatagsa ka mga
ranking aron makaaway og balik alang sa world title.
Sa iyang duha ka uwahing away nga pulos world championship, ang 23- anyos nga Landero pulos nakaangkon og duha ka unanimous decision nga kapildihan. Bisan ning kapildihan, si Villamor mihulagway kang Landero nga kuyaw nga kontra tungod kay aduna na kini igong eksepriyensiya.
Tinguha usab ni Jerusalem nga modaog ning maong away aron pag-abli sa posibilidad nga maka rematch sa
Thai boxing superstar nga si Wahneng Menayothin alang sa world title fight.
Sa una nilang panagsangka, si Jerusalem gipukan pinaagi sa desisyon.
Sa supporting main-bout, si Ernesth Domingo (10, 6KOs) sa Lebak, Sultan Kudarat mosuway sa katakos ni Reymark Taday (9-6-1, 4KOs) sa Biñan City, Laguna, samtang si Christian Bacolod (9, 7KOs) ug Christoval Furog (5, 2KOs) sa Sultan Kudarat ang nagtinguha sa pagsumpay sa limpiyo nilang baraha.
Ang laing hugna sa tulo ka parisan maoy mokompleto sa kagabhion.
Si Joyjoy Formentera sa San Francisco, Camotes Island mosakbang ni Crison Omayao sa Valencia City, Bukidnon, Danny Villafuerte Jr, batok Mark Jun Bato ug Jemuel Azucenas of Mabinay, Negros Occidental
against Kervent Aresco of Carmen Cebu.