LAKERS MIBAWOS SA TIMBERWOLVES

Leonard, Raptors mituhik sa Kings alang sa 11-1 nga record

Nakabawos ang Los Angeles Lakers sa Minnesota Timberwolves, 114-110, sa ilang duwa kagahapon sa National Basketball Association (NBA) didto sa Staples Center.

Si LeBron James mipungit og 24 puntos, 10 ka rebounds ug siyam ka assists samtang si Kyle Kuzma mitali usab og 21 puntos, unom niini sa katapusang minuto nga maoy nagselyo sa ilang kadaugan.

Ang ikaupat nga tres ni Kuzma maoy nagbingat sa labaw sa Los Angeles, 111-104, 1:51 ang nahabilin sa duwa, apan ang duha ka sunodsunod nga tres ni Derrick Rose sa T-Wolves maoy nagpahak ug naghudlat sa Lakers, 110-111.

Apan kadto maoy katapusang nabuga sa Minnesota human si Rose nasipyat sa iyang potensiyal unta nga tres ug ang rebound ni Tyson Chandler nga gisundan usab sa duha ka free throws ni Josh Hart kinsa may 21 puntos ang milansang sa ilang kadaugan.

Si Rose mipakli og 31 puntos, Jimmy Butler midugang og 24 alang sa Timberwolves kinsa nasugamak sa ilang ikaupat ka nagkutay nga kapildihan.

Samtang sa laing bahin, sa iyang pagbalik giaswat ni Kawhi Leonard ang Toronto Raptors ngadto sa ilang ika-11 nga daog batok sa usa ka pildi sa dihang ilang gibuntog ang Sacramento Kings, 114-105.

Si Leonard mihagdaw og 25 puntos, 11 ka rebounds sa kadaugan nga maoy naghatag kanila sa pinakamaayong pagsugod sa season sukad masukad.

Sa samang higayon mao usab kini ang ikalimang sunodsunod nilang daog human sa ilang pagkapildi sa mga kamot sa Milwaukee Bucks niadtong Oktubre 29.

Nidugang og 21 si Pascal Siakam, 14 kang Serge Ibaka kinsa milangkat usab og 14 ka rebounds, nakatampo usab og 16 si Kyle Lowry nga gilamasan og walo ka assists.

/ AP ■ NALIMBAROK: Maayong pagkalimbarok sa sentro sa New York Knicks nga si Enes Kanter human sa ilang linabnihay sa bola sa sentro sa Atlanta Hawks nga si Miles Plumlee sa dihang niining aktoha atol sa ilang duwa kagahapon sa NBA. Ang New York midaog sa maong panagsangka. 112-107.