Gisakyan og pulitika?

Gipasaka na ang P4.5 billion nga kaso batok sa City Government sa Naga ug sa laing lima ka kompaniya o buhatan kalabot sa landslide sa Barangay Tinaan niadtong Septiyembre 20 nga mikalas og mga kinabuhi. Kini sa tinguha nga aron mahatagan og igong hustisya kadtong mga nangabiktima sa maong trahedya ug ingon man makuhaan og leksiyon sa mga hingtungdan.

Ang manubag sa reklamo nga gisang-at sa 39 ka mga residente ngadto sa Regional Trial Court sa Naga mao ang Cemex Holdings Philippines Inc., Apo Land and Quarry Corp., Apo Cement Corp., Mines and Geosciences Bureau- 7, Naga City Government, ug ang Cebu Provincial Government.

Ang Philippine Justice Center Inc. nga gipangulohan sa environment lawyer nga si Benjamin Cabrido mipasaka usab og linahi niya nga reklamo.

Atong gihangop ug girespetuhan kining pagpasaka sa maong mga reklamo kay gawas nga katungod kini ilabi na niadtong mga naapektohan, makahatag usab kini og giya kon unsa yud ang lintunganay sa maong trahedya.

Ug sa ato nang gikaingon sa unahan nga kini maghatag og katin-awan ug ingon man dugang leksiyon ngadto sa mga hingtungdan.

Pero ambot og unsa ni ka tinuod nga daw og sa gisakyan kini og pamulitika kay duna sab kunoy mipasaka og reklamo bisan og way personalidad ug dili usab biktima.

Posibling dunay laing grupo nga may kasuko o kahiubos ba kaha sa kasamtangang administrasyon ug gustong mipahimulos lang usab sa kahigayonan. O kaha dunay gipaluyohan nga pulitiko nga gusto usab mokuha og atensiyon sa mga tawo ilabi na ning naghinangat nga piniliay.

Kini maoy angay usab bantayan o matngonan karon sa mga Nagahanons kay basin baya og mao na hinuon kini magdala sa lawgaw ug kalubog sa imbestigasyon.