Nagbangutan ang mga taxi driver
Ang pagpatay sa taxi driver nga si Victorio Molina didto sa Barangay Tisa sa dakbayan sa Sugbo nakapasubo di lang sa iyang kabanay apil na sa iyang mga kaubanang driver. Tulis ang pasiunang motibo ang gisubay karon sa mga imbestigador. Sa kagamay sa kinitaan sa mga taxi driver di masabot nganong target sila sa mga tulisan. Kung kinitaan ang ilang tuyo nganong kinahanglan pa nga iapil ang kinabuhi sa driver.
○ ○ ○
Sukad pa kaniadto hangtod karon ang mga taxi driver maisip nako nga bayani diha sa karsada. Wa hinuoy labot kadtong nagpabadlong. Gawas nga ang uban kanila akong mga ka dugo, nakabaton sab ko og daghang higala. Ka daghanan nila akong mga tinubdan sa mga kasayuran ilabi na niadtong mga tuig nga nagsige pa ta og panghagdaw og mga balita.
Sila ang maisip nako nga kasaligang tinubdan sa mga inpormasyon. Kini basi sa ilang makita samtang nagburdo burdo sa kadalanan pagpangita og pasahero. Maghisgut ta og disgrasya sa kadalanan, sunog, baha, landslide, pusil ug bisan unsa nalang nga ilang malabyan nga tapokan sa daghang tawo dali ra kaayo nilang masayran. Mao nga daghan sab kog mga exclusive nga balita gumikan sa maayong relasyon nga akong napundar sa ubang mga taxi driver. Ang uban nila akong naila-ila sa mga gitawag nga kinawboy nga kan-anan ug mga painitan. Hangtod gani karon mag-abot abot pa man mi sa among suki nga kapihanan ni Pedring diha duol sa Fuente Osmeña rotunda.
Diha man gani mga higayon nga nahimo ko nga speaker didto sa ilang grahianan aron ipasabot kong unsa ka importante ang pagtuman sa balaod sa trapiko ug pagtunol og tukma nga kortesiya sa ilang mga pasahero. Sa gidugayon sa akong pagpakiglambigit kanila akong nasayran ang kalisod sa ilang panginabuhi.
Dunay nag drive og straight, sa ato pa way ekstrador sud sa usa ka semana. May nagdrive og 24 oras og may kutob sa alas 10 sa gabii gikan sa alas 6 sa buntag. Dunay nagabang og may nag data-abang pasabot sud sa pipila ka tuig nga inabang mailaha na ang unit. Gikan sa pagka inila nga maayong tinubdan sa panginabuhian nagkahilis ang papularidad sa pagka taxi driver. Kamatuoran niini kanang daghang taxi sa mga grahianan nga wa na magbitahe tungod kay way deiver. Daghan ang nangundang ug nibalhin sa Grab, company o family driver. Ang uban nag drive og habal habal Duna man gani nisud sa construction.
○ ○ ○
Uyamot man ang pagtan-aw sa uban apan di ikalimod duna daghang mga taxi drivet ang nisugal sa ilang kinabuhi nga wa lang mabalita. Daghan nila ang instrumento sa kasulbaran sa mga krimen nga giimbistigar sa kapulisan. Panghinaot nga ang nahitabo kang Victorio di maanod sa kalimot.