Trust is not enough
Di ko gusto nga makamatikod si Rod nga love gihapon nako siya. Gisingkahan ko siya ug giwakli ko ang iyang kamot nga nagkupot sa akong bukton.
“Di na kinahanglang sultihan tika kon gimahal pa ba tika o wa na. Basta buwag na ta sukad karon!”
Nagdali kong migawas sa Jollibee. Wa koy lingi-lingi nga naglakaw sa sidewalk. Hapit na lang gani ko modagan paingon sa lugar sa gipuy-an kong boarding house. Apan dihang nalayo na ko, wa na gyud ko makapugong sa akong kaugalingon, nakahilak na gyud ko.
Unsaon nga sakit man gyud para nako ang pagpakigbuwag ko kang Rod kay dako man ang paghigugma ko niya? Apan angay lang gyud nga buhaton ko kini kay di man diay siya kasaligan. Wa gyud koy kasayoran nga hilom diay ko niyang gitraydor. Maluibon gyud diay siyang dako. Di dali ang paghikalimot niya kay gawas nga love nako siya, nahatag ko na sab ang akong lawas niya. Siya ang unang lalaki nga nakaangkon sa akong lawas.
“O, naghilak ka na man sab, Belen?”
Diha na sab sa among kuwarto si Lorena pag-abot ko sa boarding house. Iya kong gipalingkod sa ngilit sa akong higdaanan. Nagpamahid ko sa akong mga luha sa gikuptan kong panyo.
“Nakigbuwag na ko kang Rod, Lor.”
Hapit di madungog ang akong tingog kay mao may nagpasulabi sa akong pagbati ang sobrang kaguol.
“Mao nga naghilak ka? C’mon, Belen. Sakit gyud tuod kaayo kon duha tang girl sa kinabuhi sa atong uyab. Pero labaw mong gitagaan og kasakit ang imong kaugalingon ana? Pero kay mao man gyud nay imong desisyon, suportaran tika ana.”
“Salamat, Lorena, nga nia ka nga kanunay nagdasig nako.”
Ang among kasuod ni Lorena nakahatag gyud nakog kalig-on. Kanunay ko niyang gidasig sa pagpanglabay sa mga adlaw. Inanay na kong naka-move on. Inanay ko nang nadawat nga di si Rod ang lalaki nga para nako.
Unya nahiabot sa akong kinabuhi si Gerald. He’s tall, dark and handsome. Dasig siyang pagka tawo. Dali rang nakuha niya ang akong pagbati.
Nangulitawo siya nako samtang nagsakay ko sa iyang awto. Nag-joy riding mi niadtong tungora sa Busay. Nalingaw gyud ko sa pagpakig-uban niya.