SHARKS V. KNIGHTS KARON GABII: MPBL

Sumpayan og suway sa Cebu City Sharks ang ilang sunodsunod nga kadaugan sa ilang pagpakigbatok sa usa sa labing lig-ong puwersa nga mao ang host San Juan Knights sa 2018 Maharlika Pilipinas Basketball League (MPBL) Datu Cup sa Fil-Oil Flying V Centre sa San Juan, Metro Manila.

Human nagkasalimoang sa sayong bahin sa liga, nga gipasiugdahan ni Senator Manny Pacquiao, ang Sharks hinayhinay nang nakakita og kahayag human kini nakarehistro og upat ka sunodsunod nga kadaugan nga nagpasaka sa ilang rekord ngadto sa 5-8.

Sa ilang bahin, ang Knights usa mga nagpatong sa ibabaw nga bahin sa torneyo nga nagbitbit og 10-3 nga rekord.

Giangkon ni Cebu coach Norberto “Titing” Manalili nga usa kini ka malisod nga tahas hilabi na kay moasdang pa gyud sila sa balwarte sa Knights.

“Lisodlisod gyud ni nga game para namo kay ilaha pa biya ang homecourt crowd. Ang amo lang ani nga maka-sustain mi sa ilang duwa with our defense. Depensa gyud ang kinahanglan,” matod ni Manalili.

Hinuon malaumon si Manalili sa ilang poruhan gumikan kay taas ang moral sa iyang mga batos.

“Okey na man sab ang akong players kay naka-adjust na man sila sa akong system. Coming from four straight wins, taas sab ang ilang moral,” dugang ni Manalili.

Gipasabot ni Manalili nga ning kombatiha, dili pa niya iahat nga paduwaon ang bag-o niyang sakop nga si 2017 Cebu Schools Athletic Foundation Inc. (CESAFI) MVP Jaybie Manilla, produkto sa University of San Jose Recoletos (USJ-R) Jaguars.

“Two days pa lang nakaapil si Jaybie sa atong practice, nag-adjust pa siya sa atong sistema. Pero sa atong next game in Cebu, paduwaon na ni nako siya,” asoy ni Manalili.