CURRY NA-INJURED; GSW TIPI SA BUCKS
Dobleng blackeye ang nasinati sa host Golden State Warriors gumikan kay gawas nga nasugamak sila sa 134-111 nga kapildihan batok sa Milwaukee Bucks, naangol pa ang usa sa ilang mga pambato nga si 2-time MVP Stephen Curry kagahapon sa National Basketball Association (NBA).
Ang back-to-back defending champions ningkombati nang daan nga wala ang lain nilang pambato nga si Draymond Green ug misamot ang ilang gipas-ang kalbaryo human naangol ang wa nga tiil ni Curry sa tungatungang bahin sa 3rd quarter.
Nagdepensa si Curry kang Eric Bledsoe dihang naangol ang iyang wa nga tiil. Human niini, gidala si Curry sa ilang locker room ug wala na kini mobalik.
Karong adlawa, nakatakdang ipaubos sa MRI si Curry.
“He seems good to me. I’ve got to talk to him tomorrow and see how he’s doing,” matod sa laing sinaligan sa Warriors nga si Kevin Durant. “Hopefully he’s doing well.”
Si Curry mibiya sa duwa nga adunay 10 puntos.
Ang Warriors, nga nakaangkon sa ikaduha nilang pilde sulod sa 12 ka mga duwa, gipangulohan ni Klay Thompson pinaagi sa iyang 24 puntos samtang midugang og 17 puntos si Durant.
Ang Bucks, nga ningsaka sa 9-2 nga baraha, gipangulohan ni Bledsoe pinaagi sa iyang 26 puntos, nihatag og 24 puntos si Giannis Antetokounmpo samtang niamot og 20 puntos si Malcolm Brogdon.
Sa pagkawala ni Curry, nipahimulos dayon sa kahigayunan ang Bucks ug ilang gidominar ang Warriors sa pinuntosay sa 3rd quarter, 41-28, aron irehistro ang ilang ikaduhang sunodsunod nga kadaugan sa Oracle Arena.
“To come in here and play the defending champs and have a win like this, it’s huge,” matod ni Brogdon.
“It’s huge for our confidence. I think it sends a message around the league, but regardless we have to continue to play hard every night and play on both ends.”
Sa nahabiling 4:06 minutos sa 3rd quarter, nainat sa Bucks ang ilang labaw ngadto sa 93-69, ug ning higayuna, tatawng nakasabot na ang Warriors nga lisod na alang kanila ang pagbangon. “They just played hungrier than us,” asoy ni Thompson kabahin sa Bucks.