KAWAT, TULIS SA CV MIUS-US SA 2018: PRO 7

Mga kaso sa tulis ug pagpangawat sa tibuok Central Visayas gikan sa Enero hangtod sa Oktubre nikunhod itandi sa natala nga mga krimen sa susamang panahon sa milabayng tuig.

Ang pagpatakap sa mga pulis sa kadalanan usa sa mga hinungdan nga wa kaayoy nabiktima sa krimen.

Sa datos nga gipakita sa Police Regional Office 7, nakatala lang silag 3,024 ka mga kaso sa kawat ning tuig itandi sa 4,324 sa milabayng tuig.

Kana nagpasabot nga nikunhod kini og 2,107 ka mga kaso kun 30.1 porsiento sa 2018.

Samtang 1,881 ang pagpanulis sa milabayng tuig itandi sa 1,074 karong tuiga.

Nagpasabot nga kini nikunhod og 807 ka mga insidente kun 42.1 porsiento nga pag-us-us.

Sa kinatibok-an, moabot ngadto sa 2,107 ka mga kaso sa kawat ug pagpanulis ang pag menus kun 34 percent ang pagubos sa tanang kaso sa Central Visayas sa 2018 itandi sa 2017.

Sa tanang city ug provincial police office pulos miubos ang mga kaso sa kawat ug pagpanulis.

Apan sama sa naandan, ang siyudad sa Sugbo maoy adunay labing taas nga kaso sa kawat nga adunay 1,090 itandi sa 1,385 sa 2017.

Gisundan kini sa probinsya sa Sugbo nga adunay 677 itandi sa 916 sa 2017; lalawigan sa Bohol nga adunay 605 itandi sa 854 sa miaging tuig.

Ang Mandaue adunay 297 nga ubos itandi sa 360 sa 2017; Negros Oriental nga adunay 235 itandi sa 538 sa miaging tuig ug Lapu-Lapu nga adunay 108 itandi sa 253.

Ang labing ubos mao ang Siquijor nga aduna lamay 12 itandi sa 18 sa miaging tuig.

Matod ni PRO 7 Director Chief Supt. Debold Sinas nga nisaka og dyutay ang kaso sa kawat ug tulis sa dihang misulod ang ber months, apan dali nila kining nasulosyonan pinaagi sa pagbutang og daghang mga pulis sa kadalanan.

Pagsulod sa Septembre 2018, nisaka og 5.8 percent ang kawat kay nitala silag 385 ka kaso itandi sa 364 sa miaging tuig.

Ang syudad sa Sugbo maoy labing taas ang pasulbong sa kaso sa pagpanulis sa pagsulod sa Septiyembre ning tuiga.

Nakatala na silag 94 nga mas taas itandi sa 74 sa miaging tuig.

Amh ubang police office mikonhod sa susamang buwan. Ning nagkaduol na nga

holiday season, gipanglantawan nga mosaka na usab ang mga kaso sa pagpanulis ug pagpangawat hinungdan nga gitinguha ni Sinas nga makadugang pa siyag personlel gikan sa Regional Mobile Force Battalion sa matag police office sama sa syudad sa Sugbo nga padayon nga nag-una sa crime statistics.

Giangkon ni Sr. Supt. Royina Garma nga kuwang kaayo ang iyang personnel nga di makaokupar sa kadako sa siyudad sa Sugbo sanglit 1200 ra ang gidaghanon sa ilang pwersa./