PRO 7 milusad sa Oplan Alon sa kadagatan sa norte
Sa unang higayon, ang one time big time operation sa Police Regional Office (PRO) 7 gilusad batok sa ilegal nga panagat sa kadagatan sa amihanan sa Sugbo labina sa mga isla sa Bantayan ug Camotes kagahapon, Nobiyembre 11.
Nagtambayayong ang kapulisan, Philippine Coast Guard (PCG, Philippine Navy (PN) ug Bureau of Fisheries and Aquatic Resources (BFAR) 7 nga gitawawag nila og Oplan Alon o anti-illegal fishing operation pinaagi sa pagserbe sa search warrant nga giluwatan sa korte sa Sugbo batok niadtong mga mananagat nga migamit ug dinamita.
Nakasikop ang kapulisan og 17 ka mga mananagat nga nakalapas sa Republic Act 10654 kun Philippine Fisheries Code of 1998 lakip na kadtong miga- mit og dinamita.
Duha ka dinamita ang ilang nasakmit, usa ka granada, usa ka armas lakip na ang mga gamit sa ilegal nga panagat sama sa pukot nga gidili sa balaod, tulo ka compressors ug mga kagamitan niini.
Upat ka underwater flashlights ug duha ka pukot nga nga adunay 780 ka metros ang gitas-on, 14 ka blasting caps, 25 kilos nga ammonium nitrate kun pulbora nga gamit sa dinamita ug isda nga kuha sa ilegal nga paagi nga moabot sa 12 kilos.
Matod ni Chief Supt. Debold Sinas, direktor sa PRO 7, nakadawat sila og taho nga padayon ang ilegal nga panagat sa mga lungsod sa Madridejos, Bantayan, Santa Fe, San Remegio, Poro, Daan Bantayan, Medellin, San Francisco, Tudela ug Pilar.
“Rampant reports of illegal fishing activities in target areas that threaten to destroy the food and livelihood security of the local community.." matod ni Sinas.
Nakadawat usab sila og report nga daghan nang mga sakop sa Bantay Dagat sa kalungsoran nga gipanghulga sa dagkong mananagat busa hadlok mag-operasyon.