Engineer sa barko giataki, biyahe nalangay

Niabot og walo ka oras nga nalangan ang pag-abot sa biyahe sa barko nga gikan sa Cagayan de Oro City paingon sa Sugbo human ang chief engineer giataki sa kasingkasing, kagahapon, Nobiyembre 11.

Apan usa sa pasahero sa maong barko nibutyag sa Superbalita Cebu nga gabii pa

dihang nagsige og ayo ang engineer sa makina nga sama sa dunay deperensiya kini.

Alas 10:43 sa buntag kagahapon dihang nakadawat og tawag ang Coast Guard Sub-Station Naga City aron mangayo og medical assistance kabahin sa pag-ataki sa kasing-kasing ni Chief Engineer Mateo Tibay, 66.

Matod ni CGSS Naga City Petty Officer-in-charge for operations PO3 Vincent Salinas nga alas 10:50 sa buntag dihang gi-deploy nila ang ilahang aluminum boat duol sa Trans Asia 10 nga anaa sa kadagatan sa dakbayan sa Naga aron dalhon si Tibay sa duol nga tambalanan.

Alas 12:25 sa udto na dihang nadala kini nila sa baybayon dayon nadala sa South General Hospital.

Giklaro usab niini nga wala napagngan ang maong barko apan gihunong una kini alang sa medical evacuation.

Gibutyag usab sa pasahero nga nagdumili pagpangan nga wala sila mapagngi apan hinay kaayo ang dagan.

Alas 8:00 sa gabii niadtong Sabado dihang nibiya ang barko sa Cagayan ug modunggo unta kini sa Pier 4 sa dakbayan sa Sugbo alas 6:30 sa buntag.

Nnakadunggo ang barko sa Pier 4 sa siyudad sa Sugbo pasado na alas 3:00 na sa hapon kagahapon. Nobiyembre 11.