Drivers’ Academy Training gilugwayan

Gilugwayan sa Land Transportation Franchising and Regulatory Board (LTFRB) hangtod sa Disyembre 31 ang pagpaubos sa tanang mga drayber sa mga public utility vehicle sa Drivers’ Academy training.

Gitug-an ni LTFRB 7 Director Eduardo Montealto Jr. nga hangtod lang unta sa Hulyo 19 ang unang hugna sa training apan nagpadala og kamandoan ang ilang ulohang buhatan nga lugwayan kini hangtod sa katapusang adlaw sa sunod buwan.

Nakita sa ahensiya nga daghan pang mga drayber ang wa pa mapailawom sa Drivers’ Academy.

Dinhi sa Central Visayas, matod sa director, 10 porsiyento pa lang sa 28,000 ka mga drayber ang nakaagi sa maong training ug mahimong makapamaneho og publikong mga sakyanan.

Sa maong ihap, 80 porsiyento niini ang naa sa Sugbo.

Ang 28,000 base sa gidaghanon sa mga prangkisa sa tanang denomination sa mga bus pasaheroan, public utility jeepneys, taxis ug tourist buses nga narehistro sa LTFRB 7. Apil dinhi ang tua magbiyahe sa Bohol, Negros Oriental ug Siquijor.

“Dapat naka-undergo sila og phase 1 sa Drivers’ Academy training kay dili na sila maka-drive og public utility vehicles (PUV) kon wala sila maka-undergo og training effective January 1,” pahibawo ni Montealto dihang nahinabi sa Superbalita Cebu sa Dominggo, Nobiyembre 11.

Pamultahon og P5,000 ang usa ka operator kon masakpan nga nipamaneho sa iyang unit og drayber nga wa moagi sa Drivers’ Academy.

Giangkon ni Montealto nga tungod sa kagamay sa hawan sa ilang buhatan sa North Reclamation Area, tag 30 ka mga drayber lang ang mabansay ug mahunong pa kini kon dunay mga hearing sa prangkisa.

Matod niya nga maayo nalang nisugot ang tagdumala sa SM City Cebu ug SM Seaside nga mogamit og lugar sa maong malls diin moabot og 500 hangtod sa 1,000 ka draybers ang ilang mabansay sud sa walo ka oras gikan sa Martes hangtod sa BIyernes.

Sa unang hugna sa maong training, ipaubos ang mga drayber sa disiplina sama sa kinahanglan magsul-ob sila og uniporme sa pag-drive, matinahuron sa mga pasahero ug dili magpasagad og liko sa dalan ug motahod og pedestrian lanes. /