Kontaminadong mga tabay misilbi na
Nagpalit og dugang ekipo ang Metropolitan Cebu Water District (MCWD) alang sa pag-treat sa mga tabay niini nga kontaminado sa taas nga presensiya sa nitrates.
Niadtong Abril ning tuiga, walo sa 120 ka deep wells sa MCWD ang wa una gamita ug paandara gumikan sa nitrate intrusion o nakontaminahan og taas nga level sa nitrates.
Matod ni Charmaine Rodriguez-Kara, tigpamaba sa MCWD, pinaagi sa paggamit sa teknolohiya nga ion exchange resins, nakaandar ug nagamit na og balik niadtong Hulyo ang usa sa maong mga tabay.
Moabot sa 1,000 cubic meters matag adlaw ang ma-supply niini nga tubig sa kapin 1,000 ka household sa duha ka barangay sa dakbayan sa Sugbo.
Base sa www.watertechonline. com, ang ion exchange resins mao ang proseso pagtangtang sa soluble ionized contaminants sama sa kagahi ug alkalinity gikan sa tubig pinaagi sa reversible ionic interchange tali sa solid phase (resin beads) ug liquid phase (tubig).
Sigon ni Kara giobserbahan una nila sud sa duha ka buwan ang maong tabay, gikuhaan og sample ug gitan-aw ang nitrate level niini sa wala pa gipaandar og balik.
“Karon, okay gyud siya, okay gyud kaayo ang atong treatment didto. Acceptable siya for consumption,” dugang niini dihang nahinabi sa Superbalita Cebu.
Ang nitrate usa ka chemical nga kasagaran mapalgan sa mga abuno, hugaw sa mga mananap ug liquid waste ug discharge gikan sa mga septic tank nga dili regular ang paghabwa.