MCPO gibansay sa abtik nga pagresponde sa mga alarma

Sugod alas 8:00 sa buntag niadtong Nobiyebre 10, tulo ka mga alarma sa tulis, bomb threat ug pusil ang gi- alarmahan sa dakbayan sa Mandaue.

Unang gialarmahan ang giingong tulis sa usa ka gasoline station sa barangay Subangdaku, nisunod ang bomb threat sa Paknaan National high school ug ang Canduman police station ang niresponde og shooting alarm.

Nilanat ang maong pag-responde og dul-an 3 ka oras.

Apan ang maong tanan kabahin lang sa Anti Criminality incident simulation exercise sa Mandaue City Police Office.

Gawas sa mga pulis sa Subangdaku Police Station, Jagobiao Police Station ug Canduman Police station, matud ni MCPO director Police Senior Supt. Julian Entoma nga gi-test usab ang kaabtik sa pagresponde sa mga sakop sa Tactical Motorcycle Riders Unit (TMRU) ug sa Special Weapons and Tactics (SWAT) sa siyudad.

“Ideally, kada bulan unta ang pagpahigayon og mga nagkadaiyang simulation exercise, kon sa urbanize area, mai kinahanglanon ang anti-criminality simex, but tungod sa mga sunodsunod usab nga nga activities and events that we need to attend to, mao maningkamot mi nga makahimo niini quarterly,” gitug-an ni Entoma sa Superbalita Cebu.

Matod ni Entoma nga abtik ra ang kapulisan sa MCPO sa pagresponde, apan iya nakita usab nga mas maayo nga 6 ka police station sa syudad sa Mandaue ang adunay tag walo ka mga sakop sa TMRU kon 48 alang sa tibuok MCPO.

Sa pagkakaron aduna lang ang 16 ka sakop sa TMRU ang MCPO, nga maoy nagpuli-puli alanh sa 24 oras nga pagpatrolya.