MCIA o LCIA?
Sibaw ang isyu bahin sa pag-usab sa Mactan Cebu International Airport (MCIA) ngadto sa Lapu-Lapu Cebu International Airport (LCIA) human nipasar sa House committee on transportation sa Kongreso ang balaudnon sa maong kausaban nga suportado sa tanang kongresista sa Sugbo. Milambo ang proseso sa maong tinguha sa pag-amendar sa Republic Act 6958, ang nagmugna sa Mactan-Cebu International Airport Authority (MCIAA) nga gipangamahanan ni Cebu City North district representative Raul Del Mar niadtong 1991. Bugtong rason sa kausaban mao ang pag-ila sa unang nitibo nga nagmadaugan sa pagpakigbatok sa langyawng mananakop, Datu Lapulapu.
Dunay supak sama ni Secretary Adelino Sitoy, presidential adviser on legislative affairs ug pangulo sa Presidential Legislative Liaison Office. Gihulagway ni Sitoy nga dinalo ang maong lakang ug paagi kini aron mawani ang lungsod sa Cordova nga naa usab sa isla sa Mactan. Apan gihimakak kini nga alegasyon ni Lapu-Lapu City Mayor Paz Radaza, kinsa niingon nga kabahin kini sa ilang lakang alang sa pagsaulog sa ika-500 nga anibersaryo sa kadaugan ni Lapu-Lapu sa mosunod nga tuig.
Sa independenteng survey sa social media site sa SunStar Cebu, daghan ang uyon sa pagpabilin sa naandan nga MCIA tungod sa dakong gasto sa pag-usab sa ngan lakip na ang paglusad sa laing halapad nga promusyon sa pagpaila niini imbes makatutok sa pagpalambo sa serbisyo sa tugpahanan.
Ang duha ka mga habig pareho nga dunay katarungan ang nagbarog sa pag-ila sa kasaysayan o ang mikonsiderar sa dakong magasto ug magahin nga panahon sa kausaban. Ikaw unsay imong panahom? Kabahin kitas sa pagpakabana isip pasilidad kini sa kagamhanan.
Seguro, ang mas patas nga sukdanan kon unsay makaayo sa tanan maoy labing maayong tamdan, MCIA o LCIA man.