Ang Biyahe ni Mama Mary

Gitakda na sab ang laing biyahe sa Birhen sa Lindogon, Simala lungsod sa Sibonga karong Nobiyembre 19 padung sa simbahan sa bukirang barangay sa Tambo sakop sa lungsod sa Ayongon, Negros Oriental.

Kini maoy akong nasayran gikan kang Rev. Frater Ma. Martin Mangila ang pangulo sa mga Monks nga nagdumala sa Sanctuary Castle ni Mama Mary diha sa Lindogon.

Kung way kakulian ang biyahe ni Mama Mary magsugod sa Barangay Simala, Sibonga paingon sa pantalan sa Tangil sa lungsod sa Dumanjug. Isakay sa barko ang imahen padung sa Guihulngan, Negros Oriental. Gikan sa Guihulngan isakay padung sa lungsod sa Ayongon lahos ngadto sa gamay nga simbahan sa Tambo. Ang maong barangay nahimutang sa hataas nga bukid. Si Mama Mary magpalabay og tulo ka adlaw gikan sa Nobyembre 20, 21 ug 22. Pagka Nob. 23, mopatighug kini padung sa patag balik na dinhi sa Sugbo agi sa Dumaguete City diretso sa pantalan sa Sibolan.

Matod ni Frater Martin nga sama sa nakalabay nga mga biyahe ni Mama Mary sa nagkadaiyang parukya dinhi sa Visayas og Mindanao gipaabot ang pagbaha sa mga deboto sa mga karsada nga maagian sa Birhen.

Gumikan niini, mohinay ang dagan sa sakyanan paghatag og higayon sa mga deboto nga makapangaliya ngadto sa Birhen. Ang mga deboto gipahibalo nga di na mohapit sa ilang simbahan ang imahen kay modiretso na kini sa iyang distinasyon nga mao ang Barangay Tambo sa lungsod sa Ayungon. Sa ato pa kadtong gustong mohalad og mga pag-ampo sa Birhen mahimong moadto nalang sa Tambo. Mahimong mosunod sa convoy kadtong dunay mga sakyanan. Ang parukya og local government unit sa Ayongon gipaabot nga magtinabangay sa kahapsay atol sa pagduaw ni Mama Mary.

○ ○ ○

Kong nakamatikod mo nagpamihit na ang katugnaw ipabi na sa kadlawon. Daw nagpahinumdum kanato nga ang Pasko nia na og hapit nacsab ang dakong selebrasyon sa pagka tawo sa Manunubos. Ang pinalitay sa ticket ang gitawag nga advance booking murag hot cake matod pa sa incharge sa usa ka ticket outlet.

Ang booking sa mga resort og hotel nisaka na sab og gipaabot ang pagbaha sa mga bakasyonista. Kong maghisgut ta og kaadlawon may gusto lang kong ipangutana sa mga opisyal sa barangay. Hayag na ba ang mga suok suok sa barangay alang sa mga manimbahay sa kadlawon? Gamay ra kaayo ni nga butang pero dako ni og kahimoan sa mga manimbahay nga nag-antos sa kangiob sa ilang agianan di padung sa simbahan. Di ba sa di pa ang pasko magbaha ang mga manimbahay matag kaadlawon? Unta di na masukamod ang mga manimbahay tungod sa kangitngit sa ilang agianan.