Trust is not enough TEEN ROMANCE

Sa nadugay na nakong pakigkuyog kang Gerald, nag-anam nga wa na koy gana niya. Bation ko na ang kalagot sa hilom kon maghisgot siya sa iyang love ug pagpangulitawo nako.

Wa na ko magmalipayon kon ikauban ko siya. Usa ra diay ka artipisyal ang gibati kong kalipay kon ikauban ko siya labi na kon mag-joy riding mi.

“I’m sorry, Gerald. Hunonga na ang imong pagkagusto nako. Until now, si Rod pa gihapon ang nia sa akong kasingkasing. Total, duna ka na may uyab, di ba? Nakita ta man ka nga dunay gikakuyog nga girl. Malipayon mong duha.”

Mitan-aw og dugay si Gerald nako. Unya miyangu-yango siya.

“Honestly, may girldfriend ko, Belen. Kaniadto ra. Nagkalagyo mi kay miadto man siya sa Amerika uban sa iyang parents. Pero mipauli siya dinhi sa Cebu kay anhi na siya mopadayog eskuwela. Nagkabalik mi. Tinuod gyud diay nga first love never dies. Siya ang una kong gugma.”

“Salamat nga nakasabot ka, Gerald. Husto ka, di mamatay ang unang gugma. You know, Rod is my first love, too.”

Namisita gyud si Gerald nako niadtong tungora. Mipauli siya nga friend lang gihapon mi.

Nanglabay pa ang mga adlaw. Wa ko na makita si Rod nga dunay gikaubang girl labi na sa eskol. Usa ka gabii, namisita siya nako sa gisak-an kong boarding house. Diha ko sa kuwarto sa pag-abot ni Rod, ug si Lorena gyud ang nagsigeg awhag nako nga atubangon ko si Rod sa sala. Di man estrikta ang among landlady nga biyuda. Mosugot siya nga dunay lalaki nga mobisita namong mga boarders basta kutob lang sa alas diyes sa gabii.

Wa koy tingug-tingog samtang naglingkod sa atbang ni Rod. Seryuso kaayo siya.

“Gisuwayan nako nga makigrelasyon og laing babaye, Belen. Pero way kapuslanan ang tanan kay wa gyud ko makat-on sa pagmahal niya. So, nakigbuwag na ko niya. Di ko mapugos ang akong kaugalingon sa pagmahal og laing girl. Gisakitan lang ko sa akong gihimo. Ikaw ang tinuod kong love. Mobarog na ko sa akong obligasyon nimo isip akong girlfriend kon makigbalik ka nako.”

Wa na gyud ko makapugong. Migakos ko kang Rod ug gihunghongan ko siya nga love gihapon nako siya.

(KATAPUSAN)