Butler na trade na gyud; sa Philadelphia nahitugpa

Natuman na ang pangandoy ni Jimmy Butler: Nakagawas na siya sa Minnesota Timberwolves.

Unya daw sa usa lang ka pamilok, ang Philadelphia 76ers aduna na’y kaugalingon nilang Big Three nga gilaumang mohimo og grabeng langas sa Eastern Conference sa NBA.

Usa ka kasaligang tinubdan sa The Associated Press ang mibutyag nga gi-trade na sa Timberwolves ngadto sa 76ers sa usa ka package deal nga magbalhin nila ni Dario Saric ug Robert Covington ngadto sa Timberwolves.

Gawas ni Butler, mahitapon sab sa Philadelphia si Justin Patton samtang si Jerryd Bayless ug 2022 second-round pick mabalhin sa Minnesota.

Ang programa sa Philadelphia nga gitawag og The Process, nga gipangulohan sa duha ka batan-ong dekalidad nga mga magduduwa nga sila si Joel Embiid ug Ben Simmons nakahatod sa team sa 2nd round sa playoffs sa miaging season.

Sa panag-uban nila ni Embiid, Simmons ug Butler, gilaumang makahudlat sa bisan unsang puwersa nga ikaharong sa 76ers sa umaabot.

Taodtaod na sab nga nipabuhagay si Butler nga gusto na siyang mobiya sa Timberwolves.

Gikataho sa ESPN nga sa labing unang pag-apil ni Butler sa ensayo sa Timberwolves alang sa kasamtangang season, gikalalis niya ang iyang kaubang mga magduduwa, coaches ug general manager Scott Layden.

Giangkon ni Butler nga tinuod kining maong taho.

Ang Timberwolves kasamtangang nagkasalimoang sa nag-una nila ka 13 ka mga duwa diin upat ra ang kadaugan nga ilang nakuha.