Contractor sa CICC 'lowest bidder' sa Provincial Resource Center

Construction company nga maoy nitukod sa kontrobersiyal nga Cebu International Convention Center (CICC) niadtong 2006, maoy lowest calculated bidder sa pagtukod sa 20 ka andanang Provincial Resource Center sa Kapitolyo.

Duna’y laing kontraktor nga nisalmot sa bidding, apan na-disqualify ug wa na ablihi pa ang ilang financial envelope tungod sa kuwang nila nga technical document.

Sugod karong semanaha, ipaubos na sa post-qualification process ang WT Construction Incorporated nga lowest calculated bidder sa bidding niadtong

Biyernes, Nobiyembre 9.

Gitug-an sa vice chairman sa Bids and Awards Committee (BAC) nga si Jone Sepe, kompleto ug wa’y kakulian ang

technical ug legal documents sa maong kontrakto hinungdan nga gi-ablihan ang financial envelope o actual bid niini. Moabot sa P1.298 billion ang bid sa WT Construction, mas ubos og P40 milyones sa aktwal nga Approved Budget for the Contract o ABC sa

proyekto.

Sigun ni Sepe, molanat og 12 ka adlaw ang post-qualification process, diin lakip sa ilang himuon mao ang pagsusi kon tinuod ang mga dokumento nga gisumitir sa kontraktor. “Technically, compliant siya sa submission (of documents), pero i-validate pa na nato. Sa iyang SECT, wa’ ba’y conflict with other organizations. Ilang

mayor’s permit, dili ba siya expired, kon tinuod ba siya nga gi-issue sa city hall kay basin fake. Tax clearance nila, manawag sad mi sa BIR kon tinuod bang wala ni silay problema sa ilang pagbayad-bayad ug buhis,” pasabot ni Sepe.

Gawas sa pag-susi sa authenticity sa ilang mga dokumento, sutaon sab sa post-qualification kon tinuod ba ang mga proyekto nga gideklarar sa kontraktor, pinaagi sa pagbisita sa mga site niini.

Dugang ni Sepe, sutaon usab ang available equipment ug personnel sa kompaniya aron pagsiguro nga “exclusively committed” sa proyekto. Ang WT Construction maoy nitukod sa CICC niadtong 2006 aron magamit sa Association of Southeast Asian Nations o ASEAN Summit sa 2007.

Sa pagka-karon, nabaligya na sa Kapitolyo ang CICC ngadto sa Dakbayan sa Mandaue human nga nagdumili pagpaayo sa edipisyo, nga una nang gihulagway nga substandard hinungdan nga daling naguba, ilabi na niadtong na-igo kini sa linog ug bagyo.

Gipadayag ni Sepe nga hulaton sa BAC ang evaluation sa technical working group labot sa background sa WT Construction, lakip na ang gi-kwestiyon nga trabaho niini sa CICC.

Nunot niini, giklaro niya nga di pa final nga ang WT Construction ang makadawat sa

notice to award o sa kontrata sa proyekto ug magpaabot pa sa resulta sa post-qualification.

Gawas sa WT Construction, dunay laing usa ka kontraktor nga niduso og bid documents, nga mao ang Manila-based nga Finmat International Resources Incorporated.

Apan matod ni Sepe, na-disqualify kini tungod sa kakulian sa ilang giduso nga technical documents.