SHARKS BATOK LAGUNA

Atubangan sa Sugbuanong mga dumadapig, malaumon ang Cebu City Sharks nga makabangon gikan sa kapildihan sa ilang paghost sa Laguna Heroes sa main game karong gabii sa alas 9:00 ang takna sa Maharlika Pilipinas Basketball League (MPBL) Daut Cup sa Hoops Dome sa Lapulapu City.

Ang Sharks gikan sa 71-62 nga kapildihan batok sa San Juan Knights nga maoy nakaduso paubos sa rekord ngadto, 5-9.

Batok sa Heroes, nga adunay 7-7 nga rekord, nagkinahanglan og suporta sa mga Sugbuanon aron makahatag kanila og dugang kadasig sa pagsagubang ning malisod nga tahas.

“Mobawi gyud ta ani kay ato man ang home crowd. Lahi man gyud ang duwa kon ato ang home crowd maong nagkinahanglan gyud ta’g support sa mga Cebuano,” matod ni Cebu coach Norberto “Titing” Manalili.

“Pero ato sab gyud ning gipangandaman. Ready gyud ta ani nga game.”

Ning sangkaa, mabunyagan na ang labing bag-ong sakop sa Sharks nga si pointguard Jaybie Mantilla, kinsa 2017 MVP sa Cebu Schools Athletic Foundation Inc. (CESAFI).

Si Mantilla puwede na untang makaduwa dihang nakigbatok ang Sharks sa Knights apan wala lang kini gipugos ni Manalili tungod kay niadtong higayuna, bag-o pa lang gyud nakaapil sa ilang praktis ang produkto sa University of San Jose Recoletos (USJ-R) Jaguars.

“Segurado nang makaduwa si Jaybie against Laguna kay nakuha na man niya ang atong system,” asoy ni Manalili.

Makabalik na sab og duwa ang usa sa mga pambato sa Sharks nga si Raffy Oktobre.

Si Oktobre wala nakaduwa batok sa Knights gumikan kay naangol ang tuo niining kamot.

Sa premirong duwa sugod sa alas 7:00 ang takna, ang Knights makigsangka ang Imus Bandera.

Ang Knights adunay 11-3 nga rekord samtang ang Bandera naggunit og 6-6 nga rekord.