WAY KLASE SA SUGBO SA PUBLIC SCHOOLS
Makatulog og taas nga oras ang mga tinun-an sa public kindergarten, elementary ug secondary sa dakbayan ug lalawigan sa Sugbo kay way klase karong adlawa, Martes, Nobiyembre 20.
Kini human gisuspenso ni Cebu City Mayor Tomas Osmeña ang klase sa tanang ang-ang sa public school nga sakop sa dakbayan gumikan sa bagyong Samuel nga posibleng moigo sa kinapusoran sa Sugbo.
“No classes for all schools under the jurisdiction of Cebu City tomorrow,” matod sa post ni Osmeña sa iyang social media page.
Si Mayor Luigi Quisumbing sa dakbayan sa Mandaue nipahibawo na usab sa pagsuspenso sa klase sa public schools sa 27 ka barangay sa iyang siyudad.
Si Lapu-Lapu City ni Mayor Paz Radaza una rang nideklara nga way klase sulod sa duha ka adlaw, Nobiyembre 20 ug 21, di gumikan sa bagyong Samuel kon dili gumikan sa kasaulogan sa kapistahan sa Birhen sa Regla, apan natumong nga adunay bagyo.
LALAWIGAN
Gianunsyo usab ni Gobernador Hilario Davide III nga way klase ang tanang public schools nga sakop sa Probinsya sa Sugbo gumikan sa bagyo.
Ang mga private school adunay discretion kon suspensuhon ba nila o dili ang ilang kalihukan.
Ang Probinsya sa Sugbo adunay pito ka component cities ug 44 ka mga lungsod.
REKOMENDASYON
Ang Regional Disaster Risk Reduction and Management Council (RDRRMC) unang nirekomendar sa tanang local government units (LGUs) sa Central Visayas sa pagsuspenso sa mga klase gikan sa kindergarten, elementarya, ug sekondarya sa tanang publiko ug pribadong mga tunghaan sugod karong adlawa, Nobiyembre 20, hangtod ugma, Nobiyembre 21, sa tibuok rehiyon 7.
Atol sa Pre-Disaster Risk Assessment (PDRA) sa RDRRMC sa One Central Hotel, siyudad sa Sugbo sa Lunes, Nobiyembre 19, si Engr. Ver Neil Balaba, assistant regional director sa Office of the Civil Defense (OCD) 7, nihangyo sa Private Education Institutions (PEIs) labi na sa mga kolehiyo, nga mosagop usab sa pagsuspenso sa klase.
Siya namulong niini subay sa rekomendasyon ni Baltazar Tribunalo, pangu sa Provincial Disaser Risk Reduction and Management Office (PDRRMO) ug gisegundahan sa mga local disaster risk reduction officer sa mga siyudad sa Sugbo, Talisay ug Lapu-Lapu.
Si Engr. Alfredo Quiblat Jr., officer-in-charge sa Philippine Atmospheric, Geophysical and Astronomical Services Administration (Pagasa) Visayas, niingon nga base sa ilang pag-monitor sa mga modelo sa ilang buhatan ug sa Estados Unidos, ang bagyong Samuel gipaabot nga moigo sa yuta sa Sugbo sa kaadlawon sa Miyerkules.
Matod niya, momaayo na ang kahimtang sa dagan sa panahon ugma sa hapon o sa gabii.
UWAN
Matod ni Quiblat nga bisan kon hinay ang dalang hangin sa maong bagyo, apan adunay kini dala nga kusog nga pag-ulan nga angay bantayan sa publiko gikan sa pagdahili sa yuta ug baha.
Agig pagpangandam, ang kagamhanan sa dakbayan sa Mandaue ang nihimo na sa pre disaster risk assessment preparaton kagahpon sa buntag, diin gi-activate na ang mga barangay disaster team, ilabi na niadtong mga barangay nga bahaunon, sama sa mga barangay sa Subangdaku, sa may dan A.S. Fortuna sa brgy. Banilad, Paknaan ug Tipolo.
Susama usab ang gihimo sa kagamhanan sa dakbayan sa Lapu-Lapu, tug-an ni Andy Baerame, pangulo sa LLCDRRMO nga gipabantayan na usab ang bahaanan sa syudad ang mga Brgy. Basak, Bangkal, Maribago ug Gun-ob.
Samtang dugang ni Basubas nga aduna unyay padaganun nga bus ug dumptruck nga maoy mopasakay sa posibleng ma-stranded nga mga pasahero.