Wa nay drugs sa CPDRC?
Cebu Provincial Detention and Rehabilitation Center (CPDRC) mapasigarbuhon nga wa nay drugas nga nakuha sa labing uwahi nila nga mini-greyhound operation.
Matod pa, nakatampo niini ang giingong wa na pagduwa sa negosyo sa drugas ni Alvaro Alvaro, alyas Barok, sulod sa prisohan.
May ubang matang pa hinuon sa kontrabando nga nahibilin ug gipangsunog, sama na sa tabako, sigarilyo ug mga cellphone.
Human ang upat ka buwan, laing kalihukan pagsunog ug pagguba sa mga kontrabando nga nasakmit sa bilangguan gihimo sa tagdumala sa CPDRC sa Lunes, Nobiyembre 19.
Resulta kini sa mga mini-greyhound operation nga gihimo mismo ni Warden Reynaldo Valmoria.
Lakip sa mga gipangsunog ug gipang-guba ang 15 ka kilo sa tabako, 469 ka mga lighter, 476 ka kaha sa sigarilyo ug 178 ka mga cellphone.
“(Through) random (inspection) and information gathered. We also have our own assets inside. This is now the end result,” niingon si Valmoria.
Sa pipila ka ginagmay o selective greyhound operation nga gihimo ni Valmoria, mapasigarbuhon siya nga wa na siya’y nakuha bisan unsang klase sa drugas.
Matod niya, nadisiplina na og maayo ang mga piniriso sanglit regular man ang mini-greyhound ug di sab siya magduha-duha pag-padlock niadtong mga masakmitan niini.
“Barok wala na man gyud, wala na gyud siya niduwa diri. I don’t know outside,” padayag ni Valmoria.
Gawas nga maglisud og sulod ang mga kontrabando nga sama sa drugas diha sa main entrance sa prisohan, hugot sab nga gibantayan ang mga ipanglabay agi sa paril.
Matod pa, ilabay kini panahon sa kaadlawon, apan maintercept ra usab sa mga tinugyanan sa prisohan.