Headquarter sa PDP Laban gibuksan

Giablihan na sa Barug PDP-Laban sugod kagahapon ang ilang headquarter sa Cebu City north district nga nahimutang sa Commerce street, North Reclamation Area isip timaan sa ilang kaandam sa sunod tuig nga piniliay.

Si Bise Mayor Edgardo Labella, standard bearer sa PDP-Laban sa pagka-mayor sa siyudad sa Sugbo, nagkanayon nga dako og gihuptan nga papel ang headquarter sanglit di pa sila ang nagdumala sa Cebu City Hall.

“Our opponents are very formidable, I have to admit that. They have City Hall so we have to have also our headquarters. Our concern is the accessibility ,convenience of our leaders and supporters,” padayag ni Labella.

Ang Barug PDP-Laban aduna say headquarter sa Rama compound alang sa south district.

Ang ilang general headquarter nahimutang sa Rahmann street sa Barangay Zapatera ug laing tulo ka satellite headquarters.

VOX POPULI

Wa mahulga ang grupo ni Labella sa pangangkon sa Bando Osmeña Pundok Kauswagan (BOPK) nga nakapabor sila sanglit ilang kaalyado ang Barangay Guadalupe sa south ug Lahug sa north.

Ang bise mayor niingon nga tinuod ilang kaalyado ang kapitan ug iyang gihulman ang pamahayag kaniadto sa iyang kaatbang karon nga si Mayor Tomas Osmeña.

“If I remember what Tommy said before. Ingon siya kaniadto, ang barangay kapitan usa ra ka boto para niya. Taking a cue for that statement, I will just also adopt that. But it is the people who actually decide at the end of the day (election), ”padayag ni Labella.

Hinuon iyang giangkon nga adunay impluwensiya ang kapitan hinungdan nga doble ang ilang paningdamot hilabi na nga daghan og kwarta ang ilang kaatbang.