Pagtangtang sa police allowance

Ambot og unsay nasulod na pod sa utok aning “kanhi laos nga pulitiko” nga iya man gi-usab ang pamaagi sa paghatag og binuwan nga allowance sa mga sakop sa kapulisan nga ania madestino sa Cebu City Police Office (CCPO). Sugod sa sunod tuig, kadto lamang mga lumolupyo og mga registered voters dinhi sa dakbayan ang makadawat og allowance. Kadtong dili taga dinhi ug botante sa dakbayan, aw, sorry na lang.

Ang paghatag og additional nga allowance ug benepisyo sa mga empleyado sa nasudnong kagamhanan nga anaa madestino sa lokal nga kagamhanan nalatid sa Section 458 sa Republic Act 7160 kon Local Government Code of the Philippines of 1991. Adunay 1,200 ka mga pulis ang nadestino sa dakbayan. Ang hepe tigdawatan og P8,000. Ang mga station commanders makadawat og P6,000 samtang ang nga ordinaryong pulis makadawat og tag P2,500. Dili lang ang mga pulis apil na ang mga sakop sa Bureau of Fire Protection (BFP), Bureau of Jail Management and Penolo y (BJMP), National Bureau of Investigation (NBI) ingon man ang Maritime Police. Dili hinuon susama kadako sa mga sakop sa CCPO.

Ang rason nga gihatag sa “kanhi laos nga pulitiko” mao nga kakuwang na sa budget.

Sus, ang Cebu City maoy ika-upat nga pinakadatung siyudad sa tibuok nasud unya dili maka-afford. Kon iya man ipatuman ang maong bag-o niyang polisiya, dan iyang ikuridas tanan. Daghan usab nga mga empleyado sa ubang nga ahensiya nga nagdawatan nga dili lumolupyo ug mga botante sa dakbayan sa Sugbo.

Duha ra ka rason ang akong nakita niini:

Una, gipamulitika ang maong allowance. Ikaduha, gipersonal niya ang mga isyu tali niya og kang CCPO Director Royina Garma ug PRO 7 Chief Debold Sinas.

Nagkasumpaki ang “kanhi laos nga pulitiko” ug ang duha ka mga police officers human niya gitumbok nga ang kapulisan maoy nagpaluyo sa suway nga pagbanhig ni Tejero councilor Jingjing Cadungog nga iyang kaalyado sa pulitika. Madinumtanon yud.