Kausaban sa dagan sa pulitika

KULTURA? “Ang kalimot way gahum sa pagpukaw ning tanan.” Mao ni ang linya sa “Ang Gugmang Gibati Ko,” usa sa mga awit Bisaya nga way kamatayon. Ako ning gihisgutan kini nga linya sa awit tungod sa pangindahay ni Sen. JV Ejercito sa iyang kandidatora nga wa siya masulod sa 12 nga dumadaog nga kandidato pagka senador sa survey sa SWS.

Matod ni Senador Ejercito nga di siya makatuo nga ang mga kandidato nga dunay giatubang nga kasong plunder mao na hinuon ang nag-una sa survey. Akong nahinabi niadtong Sabado si Ejercito sa usa ka eksklusibo nga restawran sa dakbayan sa Sugbo tungod sa imbitasyon ni higala Choi Torralba.

Tungod sa nagsingabot nga piliay sa Mayo 13, 2019 alang sa mga senador, kongresista, ug lokal nga mga opisyales daghan nang mga kandidato ang nagsuroy-suroy aron makighimamat og usab sa ilang mga higala ingon sa mga sakop sa prensa labina dinhi sa probinsya sa Sugbo ingon man sa mga dakbayan tungod sa kadaghan sa botante.

Pung ni Senador Ejercito nga daghan siya og nabuhat sa senado mga balaodnon nga nakatabang sa katawhan ingon man sa atong nasud. Sa unom ka tuig sa iyang panerbisyo sa senado wala siya mahilambigit sa isyu sa korapsyon o sa bisan unsa nga skandalo nga may labot ang lungsod.

Tungod sa iyang mga maayo nga nabuhat sa senado ug sa katawhan di siya makatuo sa resulta sa survey sa mga botante nga wa siya maapil sa top 12. Ang mga nag-una hinuon sa survey kadtong mga senador nga dunay nagpadayon nga kaso nga plunder sa Sandiganbayan.

Akong gikomedyahan si Senador Ejercito nga maghimo siya og mga lakang sa senado sama sa pangaway ug uban pa aron madugangan ang iyang pagkaila sa katawhan. Agi og tubag sa akong komedya mipahiyum lang si Senador Ejercito dayon ingon nga “di ko kayang gawin yan attorney.”

Ang pangindahay ni Senador Ejercito sa panan-aw karon sa atong katawhan labina sa mga botante nga ang mas ilado o popular nga kandidato ang kadtong dunay giatubang nga kaso sama plunder o pagpangawkaw sa panalapi sa atong kagamhanan. Nanghinaot si Ejercito nga mausab na unta ang panglantaw sa atong mga kaigsuonan ning panahon sa internet.

Tinuod. Bisan ako di makatuo nga lahi na ang panan-aw sa kadaghanan sa atong mga botante. Morag nahimo na nga kultura sa ubang tawo nga imbis sawayon o di ba isalikway ang kadtong mga tawo nga nakasalaod mora na hinuon og ilang hero o gihimo nga ilang idolo.

Pero, ako manghinaut gihapon nga sa adlaw sa piliay ang atong mga kaigsuonan nga botante makaamgo na kon kinsa ang angayan nga pilion nga molingkod pagka senador, kongresista, gobernador, bokal, mayor ug mga konsehales sa mga nagkalain-lain nga probinsya, lungsod ug dakbayan.