Nag-naning ang kapulisan

Sunod-sunod karon ang kalampusan sa kapulisan batok sa sindikato sa gidiling drugas. Mga dinagko ang kadaghanon ug bili sa shabu nga nasakmit. Mga bag-ong nawong ang nangasikop.

Ang labing ulahing police operation mao kining pagsikop og dakong pusher nga nagdala og shabu nga nagbili og P39 milyones.

Alang kanako, timailhan kini nga naningkamot pagmaayo karon ang atong kapulisan kabahin sa pagsumpo sa sindikato sa gidiling drugas.

Bisan pa man, di lang ang gidiling drugas ang nakapaukay karon sa mga Sugboanon.

Gikinahanglan sab sa kapulisan mao ang kalampusan batok sa mga sunod-sunod nga pagpatay labi na nga nakakuha og suporta sa pipila ka mga senador ang giduso ni Sen. Grace Poe nga Senate investigation.

Gani, mas maayo nga dinhi sa Sugbo ipahigayon ang maong imbestigasyon kay importante nga matarong ang pagpahigayon sa gubat batok sa drugas.

Kon sakto ang linya nga walay labot ang kapulisan, bisan pa nga ang mga biktima nalambigit ra man gihapon, dakong sagpa gihapon kanila ang nahitabong sunod-sunod nga pagpatay.

Kining mga pagpatay nagpaila lang nga palpak ang atong sistema sa hustisya sa prevention sa krimen ug palpak sab sila sa punto sa pagsulbad niini.

Lalim bay bisan napriso na, patyon gihapon kay kuno nalambigit sa gidiling drugas?

Sa laing bahin, makatawa ko sa punto sa pipila nga wala sila makauyon sa Senate investigation kay kuno okasyon alang sa grandstanding.

Mas nahadlok pa diay kita sa grandstanding kay sa sunodsunod nga patay?

IMELDA

Gitandi sa reaksyon sa kapulisan dihang nahimung isyu ang pagpadakop kang Sen. Sonny Trillanes ug ang reaksyon sa maong ahensya dihang nakumbikto si Kong. Imelda Marcos.

Ako lang iklaro nga nahitabo kini sa Manila ug walay labot ang atong police organization dinhi sa rehiyon ug sa Syudad sa Sugbo.

Nagpanikad ang kapulisan sa kaulohan nga dakpon si Trillanes apan nagpanuko kini sa gipanawagan nga dakpon na si Imelda.

Bati man gud ang mensahe nga gipakita sa atong kapulisan. Okay lang diay kining nakumbikto sa pangawat nga binilyon? Apan diay senador nga giingong nawala lang ang iyang aplikasyon alang sa amnestiya?

Nganong dali man makabalhog sa bilanggoan sa mga makadudang mga personahe kon kini mga kabus apan kon usa ka kongresista ang dakpunon, ambot nganong mahadlok ang atong kapulisan?

Ang kataw-anan kay mas isog karon ang kadagkuan sa atong kapulisan nga mogukod sa teleserye ni SPO2 Cardo Dalisay kay sa kang Imelda.